Малийә министири америкиниң алюмин ширкитини хитайға сетишни тосуп қелишқа чақирилди

Мухбиримиз җүмә
2017-06-10
Share

Бир қисим америка дөләт мәҗлиси әзалири америка малийә министириға мәктуп йоллап, уни америкиниң алюмин мәһсулатлири ширкитини хитайға сетишни тосуп қелишқа чақирди.

Ройтерсниң хәвәр қилишичә, хитайниң җуңваң алюмин һәссидарлиқ ширкити америкиниң алюмин мәһсулатлири ширкити-алерис гуруһини 2 милярд 330 милйон долларға сетивалмақчи болған. Бу хәвәр оттуриға чиққандин кейин, 9-июн 27 нәпәр америка дөләт мәҗлиси әзаси америка малийә министири стевин мнучин әпәндимгә мәктуп йоллап, өз әндишилирини ипадилигән вә буниң бир «истратегийилик хата қәдәм» болидиғанлиқини агаһландурған. 

Хәвәрдә нәқил елишичә, мәктупта мундақ көрситилгән: «чәтәл мәбләғ селиш программилири илғар вә сәзгүр һәрбий техникиларни хитайға өткүзүп беришкә берип тақалғанда, америка чәтәл мәблиғи комитетиниң бундақ түрләргә интайин еһтиятчан муамилә қилмиқи бәк муһим.»

Хәвәрдә көрситишичә, дөләт мәҗлиси әзалири мәктупида алерис гуруһиниң америка дөләт мудапиәсигә алақидар бир қисим қетишма металларни синақ қилиш вә ишләпчиқириш билән шуғулланғанлиқи, мәзкур ширкәтниң тәтқиқати һәмдә технологийиси америка иқтисади шундақла дөләт хәвпсизлики үчүн бәкму һалқилиқ икәнликини билдүрүшкән. Улар мәктупида йәнә, җуңваң ширкитигә охшаш чоң типики ширкәтләрниң даим хитай һәрбий саһәси билән йеқин мунасивәт сақлайдиғанлиқи, буниң америкиға тәһдит шәкилләндүридиғанлиқини оттуриға қойған. 

Хәвәр қилинишичә, җуңваң хитайдики әң чиң алюмин содигири лю җоңтйәнниң қоллишиға еришкән болуп, уларниң америка алюмин мәһсулатлири ширкитини сетивелиш содиси өткән йили авғустта елан қилинған икән. 

Өткән йили ноябирда нәччә он америка дөләт мәҗлиси әзаси әйни чағдики малийә министири җәк левгә мәктуп йоллап, уни бу содини бикар қилишқа чақирған.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт