Америка федирал тәкшүрүш идариси: «хитай америка қанун органлири үчүн чоң тәһдиткә айланди»

Мухбиримиз әркин
2020-02-06
Елхәт
Пикир
Share
Принт

Америка федирал тәкшүрүш идариси, йәни FBI ‏6-феврал ахбарат йиғини өткүзүп, хитайниң америка үчүн әң чоң тәһдиткә айланғанлиқини билдүргән.

Мәзкур органниң директори кристофир рәйниң агаһландурушичә, хитай «барлиқ вастиларни ишқа селип, америка технологийәсини оғрилап кәлмәктә икән.» Крситофер рәй бу сөзләрни федирал тәкшүрүш идарисиниң пәйшәнбә күни вашингтондики «истератегийә вә хәлқара тәтқиқат мәркизи» намлиқ ақиллар амбирида өткүзгән ахбарат йиғинида тәкитлигән.

Мәзкур органниң җасуслуққа қарши туруш ишлириға мәсул директори җон бровенниң ашкарлишичә, улар өткән йили хитайға мунасивәтлик делоларда 24 кишини қолға алған. Җон бровен 2020‏-йили киргәндин буян 19 кишиниң қолға елинғанлиқини билдүргән. 

У ахбарат йиғинида: «һечқандақ дөләт бизгә комунист хитайдәк чоң тәһдит әмәс» дегән. Америка федирал тәптиш хадимлири 1‏-айниң ахирлири бостон шәһридә хитай үчүн җасуслуқ қилиш яки техника оғрилаш вәқәсигә алақидар бир делони паш қилип, 3 кишини қолға алған. Уларниң иккиси хитай, бири америкалиқ болуп, америкалиқ харвард университети биохимийә факултитиниң мудири чарлес лейбер иди.

Америка тәптиш даирилириниң ашкарлишичә, чарлес леибер хитайниң «миң талант программиси» ға қатнашқан шундақла хитайниң вухән технологийә университети билән һәмкарлашқан болсиму, лекин у буни йошуруп, америка даирилириға ялған сөзлигән. 

6‏-Февралдики ахбарат йиғинида кристофир рәй хитайниң американиң илим-пәндики кәңчиликини сүйиистемал қилип, униң техникасини оғрилаватқанлиқи, университетларда вакаләтчилирини ишқа селиватқанлиқи вә университетларда өзиниң иниститутлирини қуруватқанлиқини тәкитлигән. Униң билдүрүшичә, нөвәттә федирал тәкшүрүш идариси хитайниң америка техникасини оғрилашқа урунушиға алақидар 1000 дәк дело үстидә тәкшүрүш елип бармақта икән. Ахбарат йиғинида америка әдлийә министири виллиамму бар болуп, у нөвәттә хитайниң америкиниң «1-номурлуқ гео-сияси рәқиби» гә айланғанлиқи, униң 5G техникисида америкаға тәһдит пәйда қиливатқанлиқини билдүргән.

Пикирләр (0)
Share
Толуқ бәт