Amérikidiki yuqiri derijilik mutexessisler xitayning amérikagha qarshi "Soghuq urush" qozghawatqanliqini eskertmekte

Muxbirimiz qutlan
2018-07-23
Élxet
Pikir
Share
Print

Amérika merkiziy axbarat idarisining bir neper yuqiri derijilik mutexessisi ötken jüme küni taratqularning ziyaritini qobul qilghanda xitayning nöwette amérikigha qarshi "Soghuq urush" qozghawatqanliqini eskertken.

Birleshme agéntliqning 23-iyuldiki xewirige qarighanda, amérika merkiziy axbarat idarisi sherqiy asiya ishliri merkizining mu'awin yardemchi diréktori maykol kollin kolorado shtatida ötküzülgen bir yighinda xitayning yéqindin buyan amérikigha qarshi "Soghuq urush" élip bériwatqanliqidin agahlandurush bergen. U mundaq dégen: "Shunisi éniqki, ular bizge qarshi bir meydan soghuq urush qozghawatidu. Bu soghuq urush eyni waqitta amérika bilen sabiq sowétlar ittipaqi otturisida yüz bergen soghuq urushqa oxshimisimu, emma éniqlima jehettin u yenila soghuq urushtur."

Maykol kollin xitayning jenubiy déngizdiki herbiy kéngeymichiliki we térritoriye telipini öz mahiyiti bilen rusiyening 2014-yili qirim yérim arilini yutuwélishigha oxshatqan. 

Amérika merkiziy axbarat idarisining yuqiri derijilik mutexessisi maykol kollining xitay heqqide amérikini agahlandurushi ötken charshenbe küni amérika fédératsiye 

Tekshürüsh idarisining diréktori kristofér rayning xitay tehditi toghriliq qilghan sözidin kéyinki yene bir qétimliq agahlandurush iken. Amérika fédératsiye tekshürüsh idarisining diréktori kristofér ray ötken hepte "Jasusluqqa qarshi nuqtidin sözligende, xitay amérika üchün eng xeterlik tehdit" dégen idi.

Amérika dölet ishliri ministirliqining sherqiy asiya we tinch okyan ishlirigha mes'ul yardemchi sékrétari suzan tornton xanimmu xitaydin amérikigha kéliwatqan yoshurun xewplerni agahlandurup mundaq dégen: "Amérika uniwérsitétliridiki minglighan xitay oqughuchiliri we guruhlirining türlük namlardiki pa'aliyetlirining amérika üchün yoshurun xewp tughduruwatqanliqini téximu köp awam hés qilmaqta."

Melumki, ikkinchi dunya urushi axirlashqandin kéyin amérika bashchiliqidiki gherb démokratik lagéri bilen sabiq sowétlar ittipaqi bashchiliqidiki kommunizm lagéri otturisida yérim esir dawamlashqan "Soghuq urush" weziyiti shekillen'gen. 1989-Yili "Bérlin témi" ning örülüshi, 1991-yili sabiq sowétlar ittipaqining yimirilishi bilen "Soghuq urush" dewri axirlashqan idi. Halbuki, amérikining yuqiri derijilik mutexessislirining xitayning nöwette amérikigha qarshi élip bériwatqan bir qatar heriketlirining derijisini "Soghuq urush" atalghusi bilen süpetlishi amérika-xitay otturisidiki tirkishishning yéngi bir dewrge qedem qoyghanliqidin dérek béridiken.

Toluq bet