Xitay wekilliri amérika bilen bolghan söhbette teywen'ge yadro qorali ishletmeydighanliqigha wede qilghan

Washin'gtondin muxbirimiz erkin teyyarlidi
2024.06.21

Amérika bilen xitay bu yil 3-aydin bashlap özlirining yérim resmiy yadro qorallar hazirliqi herbiy söhbitini eslige keltürgen. Roytérs agéntliqining xewer qilishiche, söhbetke qatnashqan ikki neper amérika hökümet wekili, yérim resmiy yadro qorallar söhbitining bu yil 3-ayda eslige kelgenliki, söhbette xitayning wekili özlirining teywen'ge yadro qoralliri ishletmeydighanliqi yaki yadro qorallar tehditide bolmaydighanliqigha wede qilghan.

Bu amérika bilen xitayning yadro qorallar hazirliqliri söhbiti toxtap qalghan besh yildin béri ikki terep otturisidiki söhbetning tunji qétim qayta eslige kélishi, dep qaralmaqta. Bu xewer “Sitokholm xelq'ara tinchliq tetqiqati instituti” ning 17-iyun küni doklat élan qilip, xitay yadro qolliri qisimlirining “Bashqa herqandaq dölettin téz kéngiyiwatqanliqi” ni agahlandurushining arqisidinla élan qilin'ghan.

“Sitokholm xelq'ara tinchliq tetqiqati instituti” mezkur doklatta, xitayning qit'eler ara ballistik bashqurulidighan bombiliri sanining kelgüsi 10 yilda rusiye yaki amérikaningkidinmu éship kétish mumkinlikini agahlandurghan idi. Roytérs agéntliqining bildürüshiche, söhbette amérika terep wekili, xitay tereptin eger teywen bilen bolghan toqunushta meghlup bolsa xitay yadro qoralliri ishlitemdu yaki yadro qorallirini ishlitish halitide bolamdu, dep sorighan. Buninggha xitay terepning wekili wede bérip, xitayning yadro qorallirini ishletmeydighanliqini bildürgen.

Roytérs agéntliqining bildürüshiche, bu qétimliq ikki terep söhbitini teshkilligüchi amérika terep wekili daywid santoro (David Santoro) , “Ular amérika terepke özlirining yadro qorallarni ishletmey turupmu teywen mesilisidiki muntizim urushta ghelibe qilidighanliqigha qet'iy ishinidighanliqini éytti” dégen. Xewerlerde, washin'gtonning shangxeyde ötküzülgen bu söhbetke 6 kishilik wekiller ömiki ewetkenliki, wekiller ömikining sabiq hökümet emeldarlirini we tetqiqatchilarni öz ichige alghanliqi qeyt qilinmaqta. Halbuki, xitay söhbet ömiki sabiq xitay azadliq armiye ofitsérlirini öz ichige alghan tetqiqatchi we analizchilardin teshkil tapqan iken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.