Xongkongning axbarat erkinlik körsetküchi bu yilmu oxshashla töwenligen
2016.03.23
Istansimiz xewiri, xongkongning axbarat erkinlik körsetküchi bu yilmu oxshashla töwenligen. Xongkongdiki zhurnalistlarning axbarat erkinlik körsetküchi teshkilati” élip barghan tekshürüsh netijiliridin melum bolushiche, xongkongdiki zhurnalistlar we awam xelq her ikkilisi 2015-yili ichide “Xongkongdiki axbarat erkinlikide zor chékinish boldi” dep qaraydiken. Mutleq köp qisim zhurnalist ötken bir yilning xongkongda axbaratchiliqi üchün eng nachar bir yil bolghanliqigha ishinidiken.
Mezkur teshkilatning tor bétide élan qilin'ghan doklatta, xongkong qanunlirining zhurnalistlarni we axbarat erkinlikini qoghdashta yétersiz qéliwatqanliqi tilgha élin'ghan.
Doklatta tilgha élin'ghan yene bir muhim nuqta bolsa, “Muxbirlarning öz-özini cheklesh” mesilisi bolup, u asasliq xitay kompartiyesini tenqid qilidighan témilarda öz ipadisini tapidiken.
Mezkur teshkilatning mu'awin bashliqi shérliy yam bu heqtiki sözide “Béyjing hökümitini tenqid qilidighan témilarni ishleshtin qorqush muxbirlarning kündilik normal xizmitige tesir yetküzmekte. Qolgha élinip kétishni yaki chong quruqluqqa bérip qalsa hetta mushu xongkongda turupmu bashqa kélidighan awarichiliklerni nezerde tutqanda, bu heqiqetenmu zhurnalistlar üchün zor bir mesile” dégen.
Tenqidiy mezmundiki kitablarni sétish bilen tonulghan xongkongluq 5 neper kitabpurushning bir mezgil yoqap ketkendin kéyin, ushtumtutla peyda bolup, xitay dölet téléwiziyeside atalmish “Jinayiti” ni iqrar qilish weqesi xongkongda we shundaqla dunyada küchlük inkas qozghighan idi.
Shérliy yam xanim bayanatida mezkur weqeni tilgha élip, buning xongkongluqlargha körsetken qorqunch tesirining zor bolghanliqini eskertken.