Рабийә қадир ханим хитай һөкүмитини бастуруш сияситини тохтитишқа чақирди

Мухбиримиз меһрибан
2014-07-29
Елхәт
Пикир
Share
Принт

Дуня уйғур қурултийи рәиси рабийә қадир ханим 29-июл күни қурултай баянатчиси дилшат ришит арқилиқ баянат берип, хитай һөкүмитини уйғурларға қаратқан бастуруш сияситини тохтитишқа чақирди.

Рабийә қадир ханимниң чақириқи тәйвән мәркизи агентлиқиниң 29-июл күнидики хәвиридә берилгән болуп, дуня уйғур қурултийи баянатчиси дилшат ришит, қурултай рәиси рабийә қадир ханимниң йәкәндә 28-июл йүз бәргән хитай сақчилири билән уйғурлар оттурисидики тоқунушниң тәрәққиятиға диққәт қиливатқанлиқини вә хитай һөкүмитини вәқәгә қарита өзини тутувелип, уйғурларға қаритилған бастуруш сияситини дәрһал тохтитишқа чақирғанлиқини билдүрди.

Мәлум болушичә, 28-июл күни сәһәрдә қәшқәр йәкән наһийисидә, уйғур пидаийлири билән хитай сақчилири арисида тоқунуш йүз бәргән. Бу хәвәр дәсләп әнглийә б б с агентлиқиниң бейҗиңдики мухбири арқилиқ дуняға елан қилинған болуп, б б с агентлиқи хәвиридә вәқәдә 13 адәмниң өлгәнликини елан қилған. Ч ч қатарлиқ иҗтимаий алақә васитилиридики учурларда тоқунушта хитай сақчилиридин 7 киши, һуҗумчилардин 20 кишиниң өлгәнлики, 70 тин артуқ кишиниң тутқун қилинғанлиқи, вәқә йүз бәргән йәкән елишқу базирида сақчихана партлитиветилип, сақчи аптомобиллири көйдүрүветилгәнлики вә йезидики 300дин артуқ уйғурниң калтәк вә пичақлар арқилиқ сақчиларға тақабил турғанлиқи, вәқә тинчиғандин кейин, йәкән наһийисиниң пүтүнләй қамал қилинғанлиқи қатарлиқ әһваллар хәвәр қилинди.

Хитайниң шинху’ агентлиқи болса вәқә һәққидә 29-июл қисқа хәвәр бәргән болуп, вәқәниң тәпсилати һәққидә тохталмиди.

Пикирләр (0)
Share
Толуқ бәт