Rabiye qadir xanim xitay hökümitini basturush siyasitini toxtitishqa chaqirdi

Muxbirimiz méhriban
2014-07-29
Élxet
Pikir
Share
Print

Dunya Uyghur qurultiyi re'isi rabiye qadir xanim 29-iyul küni qurultay bayanatchisi dilshat rishit arqiliq bayanat bérip, xitay hökümitini Uyghurlargha qaratqan basturush siyasitini toxtitishqa chaqirdi.

Rabiye qadir xanimning chaqiriqi teywen merkizi agéntliqining 29-iyul künidiki xewiride bérilgen bolup, dunya Uyghur qurultiyi bayanatchisi dilshat rishit, qurultay re'isi rabiye qadir xanimning yekende 28-iyul yüz bergen xitay saqchiliri bilen Uyghurlar otturisidiki toqunushning tereqqiyatigha diqqet qiliwatqanliqini we xitay hökümitini weqege qarita özini tutuwélip, Uyghurlargha qaritilghan basturush siyasitini derhal toxtitishqa chaqirghanliqini bildürdi.

Melum bolushiche, 28-iyul küni seherde qeshqer yeken nahiyiside, Uyghur pida'iyliri bilen xitay saqchiliri arisida toqunush yüz bergen. Bu xewer deslep en'gliye b b s agéntliqining béyjingdiki muxbiri arqiliq dunyagha élan qilin'ghan bolup, b b s agéntliqi xewiride weqede 13 ademning ölgenlikini élan qilghan. Ch ch qatarliq ijtima'iy alaqe wasitiliridiki uchurlarda toqunushta xitay saqchiliridin 7 kishi, hujumchilardin 20 kishining ölgenliki, 70 tin artuq kishining tutqun qilin'ghanliqi, weqe yüz bergen yeken élishqu bazirida saqchixana partlitiwétilip, saqchi aptomobilliri köydürüwétilgenliki we yézidiki 300din artuq Uyghurning kaltek we pichaqlar arqiliq saqchilargha taqabil turghanliqi, weqe tinchighandin kéyin, yeken nahiyisining pütünley qamal qilin'ghanliqi qatarliq ehwallar xewer qilindi.

Xitayning shinxu’ agéntliqi bolsa weqe heqqide 29-iyul qisqa xewer bergen bolup, weqening tepsilati heqqide toxtalmidi.

Toluq bet