Xitay tashqi ishlar ministiri bayanatchisi Uyghur rayonidiki mesililerni inkar qilghan

Muxbirimiz jewlan
2020-10-21
Share

"Xitay xewerliri" torining 20-öktebir tarqatqan xewirige qarighanda, xitay tashqi ishlar ministirliqining bayanatchisi jaw lijiyen muxbirlarni kütüwélish yighinida pakistan ömikining Uyghur rayonigha ziyaretke barghanliqi we u yerde Uyghurlar mesilisini bayqimighanliqigha qandaq qaraydighanliqi heqqidiki so'algha jawab bérip, pakistanning "Toghra meydani" ni maxtighan, shundaqla yéqinda 48 döletning b d t 3-komitétida xitayning Uyghurlargha qaratqan siyasitini qollighanliqini tilgha alghan. U yene 2018-yildin buyan 90 nechche dölet ömekliridin kelgen mingdin artuq kishining Uyghur rayonini ziyaret qilghanliqi we u yerdiki "Tinchliq, tereqqiyat" ehwalini körgenlikini hemde xitayning "Térrorluqni yoqitish tedbiri" ni maxtighanliqi we uningdin örnek alidighanliqini bildürüshkenlikini, "Meydani toghra" zatlarning Uyghur rayonigha kélip ziyaret qilishini qarshi alidighanliqini éytqan.

Muxbir yene amérika tashqi ishlar ministiri mayk pompéyoning xitayning adem etkeschiliki bilen shughullinip, Uyghurlarni mejburiy emgekke séliwatqanliqini eyblishige xitayning qandaq qaraydighanliqi sorighanda, jaw lijiyen yenila xitay hökümitining burundin tekrarlap kéliwatqan öktem, qopal uslubi boyiche mayk pompéyoni "Yalghanchiliq we aldamchiliqni sherep dep bilidu؛ xitaygha qarshi yalghan xewerlerni tarqitidu" dep eyibligen hemde mejburiy emgek mesilisining mewjutluqini inkar qilghan hemde xitay hökümitining namratlarni yölep, ulargha ish orni tépip bergenlikini, amérikaning bolsa xitaydiki tereqqiyatni cheklesh üchün xitaydin chataq tépiwatqanliqi we xitay zawutlirigha cheklime qoyuwatqanliqini bildürgen.

Tehlilchilerning qarishiche, Uyghur rayonigha ziyaretke barghan ömekler asasen b d t kishilik hoquq yighinlirida xitayni qollighan döletler bolup, pakistan buning tipik ülgisi iken, xitay dewatqan "Meydani toghra" zatlar emeliyette xitayperes ademler yaki xitay teripidin sétiwélin'ghan kishiler iken.

Uyghur közetküchilirining éytishiche, xitay bayanatchisi jaw lijyenning mayk pompéyoni eyibligen sözliri emeliyette xitay kompartiyesining özining süpetliri bolup, xitay kompartiyisi ezeldin yalghanchiliq, aldamchiliq we oghriliqni sherep dep bilidu, hökümetning teshwiqat wasitiliri we bayanatchiliri arqiliq toxtimay yalghan xewerlerni tarqitidu.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet