"Amérika 2022-yilliq béyjing qishliq olimpik musabiqisini bayqut qilishi kérek"

Muxbirimiz irade
2019-12-02
Share

Xitay hökümitining Uyghur élide yolgha qoyghan yighiwélish lagérlirigha qarshi turush üchün xitayning 2022-yilliq qishliq olimpik musabiqisini bayqut qilish chaqiriqliri küchiyiwatqan bir mezgilde, "Los-anjélis waqti géziti" de mushu heqte bir parche köz qarash maqalisi élan qilindi.

"Amérika 2022-yilliq béyjing qishliq olimpik musabiqisini bayqut qilishi kérek" mawzuluq bu maqalini "Amérika kesipler instituti" we "Yershari teywen instituti" qatarliq tetqiqat orunlirining tetqiqatchisi maykil mazza yazghan.

U maqaliside, xitay hökümiti Uyghur rayonida milyonlarche Uyghur we bashqa musulman milletlerni yighiwélish lagérlirigha qamap, ularning milliy kimlikini yoqitiwatqanliqi heqqide éniq pakitlar ashkarilan'ghanliqini, lagérlarda ayallarni tughmas qilish we balilarni ata-aniliridin ayriwétishke oxshash irqiy qirghinchiliqning amilliri bolghan bu heriketlerning kishilerde shi jinpingning irqiy qirghinchiliq qilish niyiti barmu, dégen so'al peyda qiliwatqanliqini bayan qilghan.

U, amérika tashqi ishlar ministirliqi bu siyasetlerge chétishliq xitay emeldarlirigha wiza cheklimisi qoyghan we bir qisim xitay mu'essesilirige jaza tedbiri élan qilin'ghan bolsimu, buning yéterlik emeslikini eskertken. U töwendikilerni bayan qilghan:

"Yenimu köp tedbirler élinishi kérek. Eger amérika we bashqa döletler xitayni ghelibilik halda shinjangdiki siyasetlirini yumshitishqa köndürimen, deydiken u halda ular shi jinpingni biwasite nishan'gha élishi kérek. Teleyge, xelq'ara jama'etning uninggha qarshi qollinidighan ünümlük koziri bar, u bolsimu béyjingning 2022-yilliq qishliq olimpik musabiqisige sahibxaniliq qilishidur"

U maqaliside, xelq'ara olimpik komitéti eslide xitay hökümitining Uyghur rayonida yürgüzüwatqan siyasetlirige da'ir taghdek ispatlargha asasen, xitayning bu musabiqini ötküzüsh heqqige qayta qarap chiqishi kérekliki, emma ular buninggha köngül bölmeywatqan shara'it astida amérika qatarliq döletlerning heriketke ötüshi lazimliqini bildürgen. U mundaq dégen:

"Amérika tramp hökümiti dölet mejlisi bilen birlikte xelq'araliq hemkarliq teshkillesh arqiliq xitay eger lagérlarni taqimaydiken, u halda olimpikni bikar qilish yaki uni bashqa döletke yötkesh heqqide xelq'araliq olimpik komitétigha bésim qilish kérek. Eger olimpik komitéti buni qobul qilmay turuwalsa, u halda yuqiridiki bu hemkarlashqan döletler 2022-yilliq qishliq olimpikni bayqut qilishqa teyyarlinishi we "Erkinlik musabiqisi" namida yene bir musabiqe uyushturushi kérek. Eger tramp hökümiti heriket qilmisa, u halda dölet mejlisi amérika olimpik komitétini musabiqini bayqut qilishqa chaqirishi kérek. . ."

Aptor maykil mazza xitay hökümiti rehberliri olimpik musabiqilirini özining teshwiqat wasitisi qilip qollinip kelgenlikini nezerde tutqanda, 2022-yilliq béyjing qishliq olimpik musabiqisini bikar qilish, yötkesh yaki bayqut qilishqa oxshash heriketlerning dölet re'isi shi jinping üchün ichki siyasetliri jehette nahayiti chong nomus hésablinidighan bolghachqa, uning Uyghurlargha qaratqan siyasetlirini özgertishke mejburlash üchün ünümlük kozir bolidighanliqini tekitligen.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet