Amérika yardemchi maliye ministiri xitayning bazar igilikidin yiraqlishiwatqanliqini bildürdi
2018.03.19
Amérikining yardemchi maliye ministiri deywid malpas yekshenbe küni xitayning erkin bazar igilikidin yiraqlishishi 20 dölet guruhidiki döletlerning iqtisadida endishe peyda qiliwatqanliqini bildürgen.
U: “Dunyadiki xitaydek chong iqtisadning bazar igilikidin yiraqlishishi biz üchün yaxshi emes. Dunya buning derdini tartidu” dégen.
Deywid malpas yekshenbe küni amérika “Xelq'ara maliye instituti”da nutuq sözlep, amérikining xitay bilen “Omumyüzlük iqtisadi di'alogi” élip bérishni toxtatqanliqini bildürgen. Lékin arqidinla sözige tüzitish kirgüzüp, di'alog waqtining téxi békitilmigenlikini bildürgen idi.
U bu sözlerni argéntina paytexti boynis-ayris shehiride ötküzülgen 20 dölet guruhigha eza döletlerning maliye ministiri we merkizi banka bashliqlirining yighini harpisida qilghan.
Roytérsning xewer qilishiche, amérika hökümet emeldarlirining sözi tereplerde 20 dölet guruhining yighini amérika bilen xitayning soda urushi meydanigha aylinip qalarmu, dégen endishe peyda qilghan.
Prézidént tramp yéqinda chüshürüp, alyumin we polat -tömürge baj qoyidighanliqini élan qilghan. Bu amérikigha polat tömür we alyumin éksport qilidighan asasliq dölet xitayning naraziliqini qozghighan.
Analizchilar amérika bilen xitay otturisida soda urushi partlash éhtimali küchiyiwatqanliqini bildürgen idi. Roytérsning xewer qilishiche, tramp hökümiti yene xitayning 60 milyard dollarliq uchur-téxnika, téléfon we bashqa istémal buyumigha baj qoyushqa teyyarliq qilmaqta iken.
Xewerde, tramp hökümitining bu arqiliq xitayni amérikining eqliy mülük hoquqigha hörmet qilishqa we xitayning meblegh sélish shara'itini özgertishke qistimaqchi boluwatqanliqi tekitlen'gen. Amérika maliye ministiri stéwin mnuchin ötken hepte amérikining boynis-ayristiki yighinda xitaygha qarshi tedbir élish üchün terepdar toplaydighanliqini bildürgen idi.