Xitay, "Shinjang mesilisi" de b d t bilen "Keng da'irilik pikir birliki" hasil qilghanliqini bildürdi

Muxbirimiz erkin
2019-06-17
Élxet
Pikir
Share
Print

Xitay hökümiti térrorluqqa qarshi turush mesiliside b d t bilen "Keng da'irilik pikir birliki" hasil qilghanliqini bildürgen. Roytérs agéntliqining xewer qilishiche, xitay tashqi ishlar ministirliqi b d t ning térrorluq ishlirigha mes'ul rusiyelik mu'awin bash katipi wladimir woronkofning Uyghur rayonida élip barghan ziyaritidin kéyin bu sözlerni qilghan. Woronkofning ötken heptidiki ziyariti amérika, en'gliye qatarliq döletler we xelq'ara kishilik hoquq teshkilatlirining qattiq tenqidige uchrighan. Amérikaning mu'awin tashqi ishlar ministiri jon sulliwan ötken jüme küni woronkofning ziyaritidin qattiq endishe qilidighanliqini bildürgen. U, woronkofning ziyariti "Béyjingning Uyghur bashqa musulmanlargha qarshi élip bériwatqan basturush herikitini dawamliq perdazlap, uning qanunsiz térrorluqqa qarshi turush herikitini qanunluqtek körsitip qoyidighanliqi" ni tekitligenidi.

Roytérsning xewiride qeyt qilinishiche, xitay tashqi ishlar ministirliqi 16‏-iyun woronkofning ziyariti heqqide toxtilip: "Ikki terep xelq'ara térrorluqqa qarshi turush weziyiti, b d t bilen xitayning térrorluqqa qarshi turush hemkarliqi heqqide pikir almashturdi we keng da'irilik pikir birliki hasil qildi" dégen. 

Woronkof, xitay hökümiti b d t kishilik hoquq aliy komissari mishél bashiléyni Uyghur rayonida ziyarette bolushqa teklip qilghan, lékin bashiléy xitay hökümiti uning xalighan lagérni ziyaret qilishigha yol qoymighiche bu teklipini qobul qilmaydighanliqini bildürgen bir mezgilde mezkur rayonda ziyarette boldi. Mishél bashiléyning bayanatchisi marta xurtado ötken jüme küni radiyomizda yazma bayanat élan qilip, "Aliy komissar xitayning teklipini tapshurup aldi. Lékin biz xitay hökümiti bilen teltöküs tekshürüsh élip bérish heqqide dawamliq sözlishiwatimiz" dégen. 

Xitay, b d t aliy komissarini kishilik hoquq kéngishining 24‏-iyun bashlinidighan 41‏-nöwetlik yighini harpisida Uyghur rayonigha teklip qildi. Kishilik hoquq közitish teshkilatining xitay ishliri diréktori sofiye richardsonning ilgiri sürüshiche, bu xitayning yighinda yene tenqidlinishke taqabil turush üchün qollan'ghan bir taktikisi iken. Xitay tashqi ishlar ministirliqi woronkof bilen "Keng da'irilik pikri birliki" hasil qilghanliqini ilgiri sürgen bolsimu, lékin uning Uyghur rayonida kimler bilen körüshkenliki, térrorluqqa qarshi konkrét qaysi mesililerde "Keng da'irilik pikir birliki hasil qilghanliqi" ni chüshendürmigen.

Toluq bet