Хәлқара кәчүрүм тәшкилати: "хитай чәтәлдики уйғурларға системилиқ паракәндичилик селип кәлмәктә"

Мухбиримиз әркин
2020-02-21
Share

Дунядики нупузлуқ кишилик һоқуқ тәшкилатлириниң бири болған хәлқара кәчүрүм тәшкилати 21‏-феврал чәтәлдики уйғурлар һәққидә доклат елан қилип, хитайниң чәтәлдики уйғурларға системилиқ паракәндичилик селип келиватқанлиқини билдүргән.

Доклатта көрситилишичә, хитай һөкүмити уйғурларға паракәндичилик селишта чәтәлдики әлчиханилирини, алақә юмталлирини вә телефон алақисини қолланмақта икән. Хәлқара кәчүрүм тәшкилати бу доклатни тәйярлашта бир йилдин артуқ вақит сәрп қилип, 22 дөләттики уйғур дияридин болған 400 дәк уйғур, қазақ, өзбек вә башқа мусулман аз санлиқ милләт кишилирини зиярәт қилған.

Доклатта "уларниң гуваһлиқи паракәндичилик вә қорқутушниң һәр күни йүз берип туридиғанлиқини ечип бәрди," дейилгән. Хәлқара кәчүрүм тәшкилатиниң тәтқиқатчиси патрик пун мәзкур доклат мунасивити билән елан қилған баянатида "чәтәлдики уйғурларниң һәйран қаларлиқ баянлири хитайниң мусулманларни бастуруши өз чеграсидин һалқип, нәләргә қәдәр барғанлиқини көрситип бериду," дегән. Доклатта йәнә "дуняниң һәр қайси әллиридики шинҗаң муһаҗирлириға саһипханлқ қиливатқан һөкүмәтләрниң тәдбир қоллинип, уларни)хитайниң( паракләндичиликидин қоғдишиниң интайин муһим" икәнлики тәкитләнгән. 

Хәлқара кәчүрүм тәшкилатиниң мәзкур доклати хитайниң "қарақаш һөҗҗәтлири" намлиқ қарақаш наһийәсиниң бостан иҗтимаий районида олтурушлуқ уйғур аилилиригә даир мәхипи архипи ашкарлинип, дуняда зор ғулғула қозғиған мәзгилдә елан қилинди. Кишилик һоқуқ тәшкилатлири 137 бәтлик "қарақаш һөҗҗәтлири" ни "хитайниң бигунаһ уйғурларни қара-қоюқ тутқун қилип, лагерларға қамаштәк инсанийәткә қарши җинайитини испатлайдиған йәнә бир муһим дәлил," дәп көрсәткән. Лекин хитай һөкүмити "қарақаш һөҗҗәтлири" ни хитайға қарши күчләр тоқуп чиқарған "сахтә һөҗҗәт" дәп рәт қилған иди.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт