«Қара күчләргә зәрбә бериш» һәрикити бойичә җазалашни тезләштүрүш тоғрисида мәхсус қарар мақулланған

Мухбиримиз ирадә
2019-05-28
Елхәт
Пикир
Share
Принт

Уйғур район даирилири йеқинда уйғур аптоном район миқясида аталмиш «қара күчләргә зәрбә бериш» дәйдиған бир хил һәрикәт қозғап, һәммә кишини «өзлүкидин мәсилә тапшуруш» вә яки «паш қилиш» һәрикитигә орунлаштурған иди.

«Җуңго хәвәрләр тори» ниң 28-май күни елан қилған бир хәвиридә «тоқсун наһийәсидики қара күчләргә вә қара күчләргә муһапизәт күнлүки болғанларни җазалаш һәрикитидин кейин, тоқсун наһийәсидә өткән 11-айдин буян 51 нәпәр кадир наһийәлик интизам тәкшүрүш комитетиға өзлүкидин келип мәсилә тапшурди» дейилгән. Диққәт қозғайдиғини хәвәрдә тоқсун наһийә чарвичилиқ системисидики әмридин нурдун қатарлиқ 3 нәпәр дөләт кадириниң әмилини сүйистимал қилғанлиқи үчүн вәзиписидин елип ташланғанлиқи, икки нәпириниң әдлийә органлириға тапшуруп берилгәнлики баян қилинған.

«Тәңритағ тори» ниң хәвиридин қариғанда, уйғур район даирилири «қара күчләрни тазилаш һәрикити» гә четилип қолға елинғанларни тез сүрәттә бир тәрәп қилиш мәхсус қарар мақуллиған.

Хәвәрдә илгири сүрүлүшичә, уйғур аптоном районлуқ хәлқ тәптиш мәһкимиси, җамаәт хәвпсизлики назарити, юқири хәлқ сот мәһкимиси билән бу йил 3-айда «қара, рәзил күчләрни йоқитиш мәхсус күришидә тәһқиқләш, қолға елиш, әрз қилишни удуллаштуруш хизмитини күчәйтиш тоғрисидики пикир» ни бирликтә имзалиған.

Уйғур район даирилири бу һәрикәт арқилиқ асасий қатламдики рәһбирий шәхсләр вә кадирлар қатлимиға болған назарәтни вә уларға болған тәкшүрүш һәм зәрбә беришни нишан қиливатқанлиқи мәлум. «Тәңритағ тори» ниң хәвиридә йәнә мунулар дейилгән: «аптоном районлуқ хәлқ тәптиш мәһкимисиниң алтай вилайәтлик шөбә хәлқ тәптиш мәһкимиси қолға алмаслиқ қарар қилинған, әйиблимәслик қарар қилинған, әмәлдин қалдуруш қарар қилинған делоларға «қайта қарап чиқип», өз-өзини тәкшүрүш хизмитини чоңқур қанат яйдурди, «муһапизәт күнлүки» «мунасивәт тори» вә қара, рәзил җинайәт йип учини чоңқур қезип чиқти; үрүмчи шәһири тияншан районлуқ хәлқ тәптиш мәһкимиси қара, рәзил күчләрни йоқитиш мәхсус күриши бойичә дело беҗиридиған мәхсус гуруппа қуруп, һәрбир делони илғап тәкшүрүшни ишқа ашурди» дейилгән. Мәлум болушичә, даириләр, җайлардики әмәлдарларни вә кадирларни өзлириниң кона хаталиқлири, җинайәтлири, мәсилилири болса өзлүкидин тапшуруп иқрар қилишқа чақирип, әгәр ундақ қилмиса еғир җазалинидиғанлиқи билән агаһландуруш һәрикитини күчәйткән.

Чәтәлләрдики уйғур көзәткүчиләр юқиридики аталмиш «қара күчләр» гә зәрбә бериш һәрикитиниң аталмиш, «әсәбийликни түгитиш», «икки йүзлимичиләргә» зәрбә бериш һәрикитиниң давами икәнлики вә асасий нишаниниң уйғур қатарлиқ йәрлик милләтләр арисидики миллий аңға вә хәлқ ичидә чақириқ күчигә игә, диний етиқадни һимайә қилидиған вә өз хәлқи дуч келиватқан нөвәттики тәқибләш сияситигә наразилиқ кәйпияти бар кадирлар, зиялийлар, диний затлар вә башқилар икәнликини билдүрмәктә. Йеқинда, уйғур аптоном районлуқ интизам тәкшүрүш комитети билән ревизийә комитети тәрипидин «қара күчләргә» четилип җазаланған 6 кадирниң 3 нәпири уйғур, бир нәпири қазақ миллитидин иди.

Пикирләр (0)
Share
Толуқ бәт