"Qara küchlerge zerbe bérish" herikiti boyiche jazalashni tézleshtürüsh toghrisida mexsus qarar maqullan'ghan

Muxbirimiz irade
2019-05-28
Élxet
Pikir
Share
Print

Uyghur rayon da'iriliri yéqinda Uyghur aptonom rayon miqyasida atalmish "Qara küchlerge zerbe bérish" deydighan bir xil heriket qozghap, hemme kishini "Özlükidin mesile tapshurush" we yaki "Pash qilish" herikitige orunlashturghan idi.

"Junggo xewerler tori" ning 28-may küni élan qilghan bir xewiride "Toqsun nahiyesidiki qara küchlerge we qara küchlerge muhapizet künlüki bolghanlarni jazalash herikitidin kéyin, toqsun nahiyeside ötken 11-aydin buyan 51 neper kadir nahiyelik intizam tekshürüsh komitétigha özlükidin kélip mesile tapshurdi" déyilgen. Diqqet qozghaydighini xewerde toqsun nahiye charwichiliq sistémisidiki emridin nurdun qatarliq 3 neper dölet kadirining emilini süy'istimal qilghanliqi üchün wezipisidin élip tashlan'ghanliqi, ikki nepirining edliye organlirigha tapshurup bérilgenliki bayan qilin'ghan.

"Tengritagh tori" ning xewiridin qarighanda, Uyghur rayon da'iriliri "Qara küchlerni tazilash herikiti" ge chétilip qolgha élin'ghanlarni téz sür'ette bir terep qilish mexsus qarar maqullighan.

Xewerde ilgiri sürülüshiche, Uyghur aptonom rayonluq xelq teptish mehkimisi, jama'et xewpsizliki nazariti, yuqiri xelq sot mehkimisi bilen bu yil 3-ayda "Qara, rezil küchlerni yoqitish mexsus kürishide tehqiqlesh, qolgha élish, erz qilishni udullashturush xizmitini kücheytish toghrisidiki pikir" ni birlikte imzalighan.

Uyghur rayon da'iriliri bu heriket arqiliq asasiy qatlamdiki rehbiriy shexsler we kadirlar qatlimigha bolghan nazaretni we ulargha bolghan tekshürüsh hem zerbe bérishni nishan qiliwatqanliqi melum. "Tengritagh tori" ning xewiride yene munular déyilgen: "Aptonom rayonluq xelq teptish mehkimisining altay wilayetlik shöbe xelq teptish mehkimisi qolgha almasliq qarar qilin'ghan, eyiblimeslik qarar qilin'ghan, emeldin qaldurush qarar qilin'ghan délolargha "Qayta qarap chiqip", öz-özini tekshürüsh xizmitini chongqur qanat yaydurdi, "Muhapizet künlüki" "Munasiwet tori" we qara, rezil jinayet yip uchini chongqur qézip chiqti؛ ürümchi shehiri tiyanshan rayonluq xelq teptish mehkimisi qara, rezil küchlerni yoqitish mexsus kürishi boyiche délo béjiridighan mexsus guruppa qurup, herbir déloni ilghap tekshürüshni ishqa ashurdi" déyilgen. Melum bolushiche, da'iriler, jaylardiki emeldarlarni we kadirlarni özlirining kona xataliqliri, jinayetliri, mesililiri bolsa özlükidin tapshurup iqrar qilishqa chaqirip, eger undaq qilmisa éghir jazalinidighanliqi bilen agahlandurush herikitini kücheytken.

Chet'ellerdiki Uyghur közetküchiler yuqiridiki atalmish "Qara küchler" ge zerbe bérish herikitining atalmish, "Esebiylikni tügitish", "Ikki yüzlimichilerge" zerbe bérish herikitining dawami ikenliki we asasiy nishanining Uyghur qatarliq yerlik milletler arisidiki milliy anggha we xelq ichide chaqiriq küchige ige, diniy étiqadni himaye qilidighan we öz xelqi duch kéliwatqan nöwettiki teqiblesh siyasitige naraziliq keypiyati bar kadirlar, ziyaliylar, diniy zatlar we bashqilar ikenlikini bildürmekte. Yéqinda, Uyghur aptonom rayonluq intizam tekshürüsh komitéti bilen réwiziye komitéti teripidin "Qara küchlerge" chétilip jazalan'ghan 6 kadirning 3 nepiri Uyghur, bir nepiri qazaq millitidin idi.

Toluq bet