Xitay sadam abdusalamning ayaligha bésim qilip yoldishining pa'aliyetlirini chekleshke urunmaqtiken

Muxbirimiz irade
2019.07.26

Awstraliye puqrasi bolghan ikki yashliq oghli lutfiyar we ayali nadireni awstraliyege qayturup kélish üchün toxtimay pa'aliyet qiliwatqan sadam abdusalamning awstraliyediki ABC xewerler torigha bildürüshiche, xitay da'iriliri uning ayaligha tehdit sélip, abdusalamning pa'aliyetlirini toxtitishini telep qilghan.

Biraq sadam qachan ayali we balisi bilen awstraliyede jem bolmighuche pa'aliyetlirini toxtatmaydighanliqini tekitligen.

Apisi we ayali lagérgha tutqun qilin'ghan awstraliye puqrasi almas nizamidin we sadam abdusalamlar aldinqi hepte awstraliyediki “Töt bulung” programmisigha qatniship, özlirining béshigha kelgen bu külpet bilen birge Uyghur élide yolgha qoyuluwatqan lagérlar heqqide guwahliq bergendin kéyin zor ghulghula peyda qilghan.

Netijide 7-iyul küni awstraliye tashqi ishlar ministiri merays peyn béyjingdiki xitay elchixanisigha awstraliye puqrasi sadam abdusalamning xitayda qalghan ayali we balisini xitaydin chiqishqa yol qoyush heqqide bayanat élan qilghan.

Xitay tashqi ishlar ministirliqining bayanatchisi géng shu'ang 17-iyul qilghan sözide “Eger awstraliye hökümiti bizni bu ehwalgha munasiwetlik tepsilatlar bilen teminlise, biz choqum ularni biz ezeldin qilip kelgendek zörür bolghan yardem bilen teminleymiz,” dégen idi. Biraq sadamning ABC xewerler torigha bildürüshiche, gerche xitay shundaq dégen bolsimu, biraq shu kündin bashlap da'iriler sadamning ayali nadireni her küni soraq qilishqa bashlighan we “Yoldishing pa'aliyetlirini toxtatsun” dep bésim qilghan.

Melum bolushiche, sadam abdusalam we almas nizamidinlar 24-iyul charshenbe küni awstraliyening paytexti kanbérrrada bir qisim parlamént ezaliri bilen körüshüp, awstraliye hökümitini bu mesilide jiddiyraq tedbir élishqa dewet qilghan.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.