Хитай садам абдусаламниң аялиға бесим қилип йолдишиниң паалийәтлирини чәкләшкә урунмақтикән

Мухбиримиз ирадә
2019-07-26
Елхәт
Пикир
Share
Принт

Австралийә пуқраси болған икки яшлиқ оғли лутфияр вә аяли надирәни австралийәгә қайтуруп келиш үчүн тохтимай паалийәт қиливатқан садам абдусаламниң австралийәдики ABC хәвәрләр ториға билдүрүшичә, хитай даирилири униң аялиға тәһдит селип, абдусаламниң паалийәтлирини тохтитишини тәләп қилған.

Бирақ садам қачан аяли вә балиси билән австралийәдә җәм болмиғучә паалийәтлирини тохтатмайдиғанлиқини тәкитлигән.

Аписи вә аяли лагерға тутқун қилинған австралийә пуқраси алмас низамидин вә садам абдусаламлар алдинқи һәптә австралийәдики «төт булуң» программисиға қатнишип, өзлириниң бешиға кәлгән бу күлпәт билән биргә уйғур елидә йолға қоюлуватқан лагерлар һәққидә гуваһлиқ бәргәндин кейин зор ғулғула пәйда қилған.

Нәтиҗидә 7-июл күни австралийә ташқи ишлар министири мәрайс пәйн бейҗиңдики хитай әлчиханисиға австралийә пуқраси садам абдусаламниң хитайда қалған аяли вә балисини хитайдин чиқишқа йол қоюш һәққидә баянат елан қилған.

Хитай ташқи ишлар министирлиқиниң баянатчиси гең шуаң 17-июл қилған сөзидә «әгәр австралийә һөкүмити бизни бу әһвалға мунасивәтлик тәпсилатлар билән тәминлисә, биз чоқум уларни биз әзәлдин қилип кәлгәндәк зөрүр болған ярдәм билән тәминләймиз,» дегән иди. Бирақ садамниң ABC хәвәрләр ториға билдүрүшичә, гәрчә хитай шундақ дегән болсиму, бирақ шу күндин башлап даириләр садамниң аяли надирәни һәр күни сорақ қилишқа башлиған вә «йолдишиң паалийәтлирини тохтатсун» дәп бесим қилған.

Мәлум болушичә, садам абдусалам вә алмас низамидинлар 24-июл чаршәнбә күни австралийәниң пайтәхти канберррада бир қисим парламент әзалири билән көрүшүп, австралийә һөкүмитини бу мәсилидә җиддийрақ тәдбир елишқа дәвәт қилған.

Пикирләр (0)
Share
Толуқ бәт