Da'irilerning xitaygha xas örp-adetlerni Uyghurlargha téngishi eyibleshke uchridi

Xitay xelq torining 10-öktebirdiki süretlik xewiridin melum bolushiche, xitayning dölet bayrimini tebriklesh munasiwiti bilen Uyghur diyarining yéza-kentliride her xil mezmundiki pa'aliyetler uyushturulghan bolup, öktebir bayrimi mezgilide qeshqer shehirining qoghan yéza kichik ériq kentide yash erlerning qiz-chokanlarni yüdüp yügürüsh musabiqisi ötküzülgen.

Mezkur xewerdiki süretlerdin, meydan'gha yighilghan kishilerning arisida yene qizil kiyim kiydürülgen yashan'ghan boway, momaylarningmu barliqi melum.

Da'irilerning yéqinqi yillardin buyan Uyghur yézilirida qizil naxsha éytish qatarliq kommunist teshwiqatini kücheytkendin bashqa, Uyghurlargha qarita diniy étiqadni suslashturush teshwiqat pa'aliyetlirini yolgha qoyushi chet'ellerdiki Uyghur teshkilatliri we Uyghur pa'aliyetchilirining tenqidige uchrawatqan shara'itta, erlerning ammiwi sorunlarda qiz-chokanlarni yüdüp méngishidek, xitay medeniyitige xas pa'aliyet-heriketlerni Uyghurlargha mejburiy téngishi chet'ellerdiki Uyghur teshkilatliri we pa'aliyetchilirining qattiq naraziliqini qozghidi.

Dunya Uyghur qurultiyining diniy ishlar mudiri turghunjan alawudun ependi radiyomizning ziyaritini qobul qilip, “Da'irilerning yéqinqi yillardin buyan Uyghurlarning diniy étiqadi we medeniyitini suslashturush meqsitide élip bériwatqan teshwiqat we pa'aliyetlirining Uyghur milliy exlaqini haqaretlesh derijisige yetkenliki” ni bildürdi. Turghunjan ependi yene “Xitayning qattiq basturushi seweblik, öz wetinide yashawatqan Uyghurlar naraziliqini ipadileshke imkansiz boluwatqan bügünkidek shara'itta, chet'ellerdiki Uyghur teshkilatliri, pa'aliyetchiliri, diniy zatlar hetta her bir Uyghurning bu xil ehwallarni dunyagha ashkarilishi we naraziliq bildürüshining texirsiz mejburiyet ikenliki” ni tekitlidi.

Buni bésish arqiliq, pikringizni yézing

• Print
• Hembehr
• Ewetish

Barliq pikir - bayanlarni körüsh.

• Bügünki anglitish
• Ilgiriki anglitishlar