«Ню-йорк вақти» гезити хитай һөкүмитиниң америкидики уйғур җамаитигә бесим қилишқа урунуватқанлиқини хәвәр қилди

Мухбиримиз ирадә
2018-10-19
Елхәт
Пикир
Share
Принт

Бүгүн «ню-йорк вақти» гезити хитай һөкүмитиниң америкидики уйғурларни юртидики уруқ-туғқанлири арқилиқ җазалаватқанлиқи һәққидә бир кәң көләмлик мақалә елан қилинди.

Мәзкур мақалидә баян қилинишичә, америкидики актип уйғур кишилик һоқуқ паалийәтчиси рошән аббас ханим алдинқи айда вашингтондики бир тәтқиқат мәркизи тәрипидин уйғур елидики лагерлар һәққидә орунлаштурулған бир йиғинда сөзгә чиқип, аридин 6 күн өтә-өтмәйла өзиниң үрүмчидики ачиси вә һаммисиниң йоқап кәткәнлики һәққидә учур алған. Рошән ханим уларниң өзиниң америкидики паалийәтлири сәвәбидин лагерға қамалған болуши мумкинликини ейтқан.

Хитай һөкүмити чәтәлләрдики уйғурларға уларниң юртидики аилә-тавабиатлириниң бихәтәрликини пәш қилип туруп бесим ишлитиш һәрикитини қаттиқ күчәйткән иди. Америка кеңәш палата әзаси марко рубийо «ню-йорк вақти» гезитигә қилған сөзидә «хитай һөкүмитиниң америкидики уйғур җамаитигә қолни узартиши қобул қилишқа болмайдиған бир әһвал», дәп тәкитлигән. Марко рубийо әпәнди техи йеқинда америка федератсийә тәкшүрүш идариси ‏(FBI) дин хитай һөкүмитиниң америкидики уйғур җамаитигә бесим қилиш вә тәқиб қилиш әһвалини җиддий тәкшүрүшни тәләп қилған иди.

Хәвәрдә йәнә, виригинийә штатиниң җумһурийәт партийәси вәкили барбара комсток ханимниң бу штатта олтурушлуқ уйғур яшлардин фирқәт җәвдәтниң лагерға қамалған аниси мунәввәр турсунниң из-дерикини қилип хитай баш әлчиси сүй тийәнкәйгә 3 қетим мәктуп әвәткәнлики, әмма хитай тәрәпниң җаваб бериштин өзини қачуруп келиватқанлиқи баян қилинған.

Рошән аббас ханим «ню-йорк вақти» гезитигә қилған сөзидә өзиниң бир америка пуқраси болуш сүпити билән өз һоқуқлиридин бәһримән болуватқанлиқини вә буниң бәдилини өзи 21 яш вақтида айрилип чиқип кәткән аилиси төлимәслики керәкликини әскәрткән. У, хитай һөкүмитини хәлқара қанунларға һөрмәт қилип, әхмиқанә һәрикәтлиридин ваз кечишкә чақирған.

Пикирләр (0)
Share
Толуқ бәт