“Nyu-york waqti” géziti xitay hökümitining amérikidiki Uyghur jama'itige bésim qilishqa urunuwatqanliqini xewer qildi

Muxbirimiz irade
2018.10.19

Bügün “Nyu-york waqti” géziti xitay hökümitining amérikidiki Uyghurlarni yurtidiki uruq-tughqanliri arqiliq jazalawatqanliqi heqqide bir keng kölemlik maqale élan qilindi.

Mezkur maqalide bayan qilinishiche, amérikidiki aktip Uyghur kishilik hoquq pa'aliyetchisi roshen abbas xanim aldinqi ayda washin'gtondiki bir tetqiqat merkizi teripidin Uyghur élidiki lagérlar heqqide orunlashturulghan bir yighinda sözge chiqip, aridin 6 kün öte-ötmeyla özining ürümchidiki achisi we hammisining yoqap ketkenliki heqqide uchur alghan. Roshen xanim ularning özining amérikidiki pa'aliyetliri sewebidin lagérgha qamalghan bolushi mumkinlikini éytqan.

Xitay hökümiti chet'ellerdiki Uyghurlargha ularning yurtidiki a'ile-tawabi'atlirining bixeterlikini pesh qilip turup bésim ishlitish herikitini qattiq kücheytken idi. Amérika kéngesh palata ezasi marko rubiyo “Nyu-york waqti” gézitige qilghan sözide “Xitay hökümitining amérikidiki Uyghur jama'itige qolni uzartishi qobul qilishqa bolmaydighan bir ehwal”, dep tekitligen. Marko rubiyo ependi téxi yéqinda amérika fédératsiye tekshürüsh idarisi ‏(FBI) din xitay hökümitining amérikidiki Uyghur jama'itige bésim qilish we teqib qilish ehwalini jiddiy tekshürüshni telep qilghan idi.

Xewerde yene, wiriginiye shtatining jumhuriyet partiyesi wekili barbara komstok xanimning bu shtatta olturushluq Uyghur yashlardin firqet jewdetning lagérgha qamalghan anisi munewwer tursunning iz-dérikini qilip xitay bash elchisi süy tiyenkeyge 3 qétim mektup ewetkenliki, emma xitay terepning jawab bérishtin özini qachurup kéliwatqanliqi bayan qilin'ghan.

Roshen abbas xanim “Nyu-york waqti” gézitige qilghan sözide özining bir amérika puqrasi bolush süpiti bilen öz hoquqliridin behrimen boluwatqanliqini we buning bedilini özi 21 yash waqtida ayrilip chiqip ketken a'ilisi tölimesliki kéreklikini eskertken. U, xitay hökümitini xelq'ara qanunlargha hörmet qilip, exmiqane heriketliridin waz kéchishke chaqirghan.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.