Xitay hökümiti 17 döletning taratqu mes'ullirini teklip qilip, Uyghurlarning “Normal, bextlik yashawatqanliqi” ni körsetken

Washin'gtondin muxbirimiz jewlan teyyarlidi
2023.10.04

Xitay “Shinxu'a agéntliqi” ning xewer qilishiche, xitay gowuyüen axbarat ishxanisi bilen Uyghur aptonom rayonluq axbarat ishxanisi birlikte uyushturghan “Yipek yoli iqtisad belbéghi döletliri taratqulirini ortaq berpa qilish mes'ulliri muhakime sinipi” ötken ayning axirqi heptiside échilghan bolup, uninggha bélgiye, kanada, gérmaniye, hindonéziye, iran, qazaqistan qatarliq 17 dölettin kelgen 22 taratqu mes'ulliri qatnashqan.

Xitay da'iriliri ularni ürümchi, qeshqer, ilidiki nuqtiliq sayahet orunliri we ziyaret nuqtilirigha bashlap kélip, “Shinjangning güllen'gen iqtisadi, jem'iyetning inaq we muqimliqi, her millet medeniyitining rengdarliqi” ni körsetken, andin buni 10 yildin buyan élip bériliwatqan “Bir belbagh bir yol qurulushining shanliq ghelibisi” dep teshwiq qilghan.

Xitay hökümiti özining Uyghur rayonida irqiy qirghinchiliq jinayiti ötküzmigenlikini, “Her milletning tinch, bextlik” yashawatqanliqini körsitish urunushlirini bu xil qipyalingach shekilde otturigha chiqarghan. Mesilen, bu xewerde chet el taratquliri mes'ullirining xitayning siyasetlirini her tereptin maxtighanliqi körülidu:

 Beziliri xitayning “Térrorluqqa qarshi turup, esebiylikni tügitish muweppeqiyetliri” ni maxtighan bolsa, beziliri “Bir belbagh bir yol qurulushining ulugh netijiliri” ni medhiyeligen. Gérmaniye “Bérlin géziti” iqtisad sehipisining mes'uli mundaq dégen: “Men gérmaniye kochilirida sergerdanlarni körettim, shinjang kochilirida birmu namrat, bicharilerni körmidim. Ademlirining hemmisining xizmiti bar iken, turmushi güzel iken” .

 Ular yene xitayning bu “Tereqqiyat yoli we milletlerni bashqurush siyasiti” ni gherbliklerning öginishi kéreklikini éytqan. Omumen éytqanda, xitay hökümiti bu teshwiqat pa'aliyitide közligen nishanigha yetken we buni xewer qilghan.

 Halbuki, dunyaning her qaysi jayliridiki chong axbarat wasitiliri we heqiqetni ashkarilashni tüp pirinsip qilghan muxbirlar xitayning köz boyamchiliqi we saxtiliqini ashkarilap kelmekte. Rahile dawutning ömürlük qamaqqa mehkum qilinishidek chong xewerler ene shundaq taratqu wasitiliride dunyaning diqqitige sunulmaqta.  

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.