Démokratik islahat élip bérishni telep qilghan xitay adwokat "Aghdurmichiliq" bilen eyiblendi

Muxbirimiz erkin
2018-01-29
Élxet
Pikir
Share
Print

Xitayda démokratik islahat élip bérishni telep qilip tutqun qilin'ghan kishilik hoquq adwokati yü wénshing xitay da'iriliri teripidin hakimiyetni aghdurushqa qutratquluq qilish jinayiti bilen resmiy eyiblen'gen. Birleshme agéntliqining xewer qilishiche, béyjing saqchi da'iriliri ötken shenbe küni yü wénshingning ayaligha uqturush qilip, uning yoldishining resmiy eyiblen'genliki, uning shüjow saqchi da'irilirige ötküzüp bérilidighanliqini bildürgen. Kishilik hoquq teshkilatlirining ilgiri sürüshiche, "Hakimiyetni aghdurushqa qutratquluq qilish" jinayiti intayin müjmel bir uqum bolup, xitay hökümiti öktichilerni basturushta bu uqumni keng qollinip kelgen.

Yü wénshing 19‏-yanwar küni béyjingda 13 yashliq oghlini mektepke apirip qoyush üchün aptomobilda saqlap olturghanda saqchilar teripidin opul-topul tutqun qilin'ghan. U tutqun qilinishtin bir kün burun torda pikri yézip, "Bir döletning prézidénti xelq teripidin saylanmisa, uning meyli xitayda meyli dunyada meyli xelq ichide héchqandaq inawiti bolmaydu" dégen. Birleshme agéntliqining xewiride qeyt qilishiche, yü wénshing tutqun qilin'ghandin kéyin saqchilar uning öyi we ishxanisini axturup, kompyutér, qol téléfoni we nurghun matériyallirini élip ketken. Da'iriler yene yü wén shingning ayalini shi jingshen saqchi ponkitigha élip bérip, soraq qilghan we bir kéche solap qoyup, etisi qoyup bergen. 

Yü wénshing burun 2 qétim tutqun qilin'ghan bolsimu, biraq her ikki qétimda qoyup bérilgen idi. Lékin, bu qétim uning tutqun qilinishi xelq'ara axbarat we kishilik hoquq teshkilatlirining keng diqqitini qozghidi. Xelq'ara kechürüm teshkilati yü wénshingning "Ten jazasi yaki bashqa qopal mu'amililerge uchrishidin endishe qiliwatqanliqi" ni bildürgen.

Toluq bet