Bir xitay diplomat üstidin uni b d t ge dessetmeslik heqqide shikayet sunulghan

Muxbirimiz shöhret hoshur
2018-03-21
Élxet
Pikir
Share
Print

"Amérika awazi" radiyosining xewer qilishiche, tünügün jenwede échilghan b d t ning kishilik hoquq yighini bashlinishtin burun yighin'gha kelgen xitay hökümet wekilliri guruppisidiki bir xadim xitay öktichi zat yang jyenlige tehdit salghanliqi üchün bir nazaretchi teripidin mezkur xitay wekilni buningdin kéyin b d t diki yighinlargha dessetmeslik heqqide b d t kishilik hoquq komitétigha shikayet sunulghan.

Melum bolushiche, yighin bashlinishtin awwal mezkur xitay xadim yighin zaligha kiriwatqan yang jyenlini toxtawsiz resimge tartqan. Xewerde déyilishiche, u bu herikiti arqiliq yang jyenlige tehdit salmaqchi bolghan. Bu heqte pikir bayan qilghan yang jyenli, "U xadim méni qorqutmaqchi boldi, emma ghelibe qilalmidi," dégen.

U yene özining bu xil tehditlerge köp uchrighanliqi, hetta ölüm tehditige uchrighandimu qorqmighanliqini xitay hökümet wekillirining ésidin chiqarmasliqini alahide eskertken.

Nöwette chet'ellerde közge körün'gen xitay démokratchiliridin biri bolghan yang jyenli Uyghur pa'aliyetchilerdin dunya Uyghur qurultiyining aliy rehbiri rabiye qadir xanim we qurultayning nöwettiki re'isi dolqun eysalar bilen izchil halda hemkarliship kelmekte.

U aldinqi yili türkiyede ötküzülgen bir qétimliq sherqi türkistan pa'aliyitige qatnishiwatqan mezgilde xitay dölitining Uyghurlargha uzun yillardin béri köp zulum salghini tilgha élip, xitay xelqi namidin Uyghurlardin kechürüm soraydighanliqini bildürgen idi.

Toluq bet