Америка хитайни дини әркинлик җәһәттә "алаһидә әндишә қозғаватқан дөләт" дәп баһалиди

Мухбиримиз ирадә
2018-01-04
Share

Америка хитайни дини әркинлик җәһәттә "алаһидә әндишә қозғаватқан дөләт" дәп баһалиди. Бүгүн америка дөләт ишлири министирлиқи 1988 йили мақулланған "хәлқара диний әркинлик қарари" ға асасән хитай қатарлиқ 10 дөләтни дини әркинлик җәһәттә "алаһидә әндишә қозғаватқан дөләтләр" қатариға киргүзди.

Америка дөләт ишлири министирлиқиниң баянатчиси һетер наортниң нами билән елан қилинған баянатта, дунядики нурғун җайларда кишиләрниң пәқәт өзиниң диний етиқади сәвәблик зиянкәшликкә учраватқанлиқи, наһәқ әйиблинип, түрмиләргә солиниватқанлиқи баян қилинған. Униңда йәнә диний әркинликни муһапизәт қилишниң тинчлиқ, муқимлиқ вә баяшатлиқ үчүн кәм болса болмайдиған бир амил икәнлики әскәртилгән.

Баянаттин мәлум болушичә, америка бу йил хитай, берма, еритерийә, иран, шималиий корийә, судан, сәуди әрәбистан, таҗикистан, түркмәнистан вә өзбекистан қатарлиқ он дөләтни "алаһидә әндишә қозғаватқан дөләтләр" қатариға киргүзгән. Пакистанни болса "пәвқуладдә көзитилишкә тегишлик дөләт" дәп баһалиған.

Баянатта американиң юқириқи дөләтләрдики дини әркинлик вәзийитини яхшилаш үчүн һәрқайси һөкүмәтләр, иҗтимаий тәшкилатлар, дини рәһбәрләр билән бирликтә хизмәт қилидиғанлиқи вә дуняда диний әркинликни тәшәббус қилишниа давам қилидиғанлиқи әскәртилгән.

Илгири америка дөләт мәҗлисигә қарашлиқ хитай ишлири комитети елан қилған доклатлардиму хитайниң уйғурлар, тибәтләр вә фалунгуң муртлири қатарлиқ милләт вә дини гуруппиларға қаттиқ бесим қилип, уларниң диний паалийәтлирини чәкләватқанлиқи баян қилинған иди.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт