Xitay hökümiti Uyghur rayonidiki milletlerni ishqa orunlashturushqa "Yüksek derijide ehmiyet bergenliki" heqqide doklat élan qilghan

Muxbirimiz jewlan
2020-10-21
Élxet
Pikir
Share
Print

"Xitay xewerliri" torining 21-öktebir élan qilghan xewiride bildürülüshiche, shinjang tereqqiyat tetqiqat merkizi 20-öktebir "Shinjangdiki az sanliq milletlerning ishqa orunlishishini tekshürüsh doklati" ni élan qilghan bolup, "Buningdin shinjang Uyghur aptonom rayoni hökümitining az sanliq milletlerning ishqa orunlishishi mesilisige yüksek derijide ehmiyet bergenlikini, her millet xelqning ishqa orunlishish arzusigha hörmet qilip, ularni mulazimetni nishan qilghan ish ornigha teshkillik halda orunlashturghanliqini körüwalghili bolidu" déyilgen.

Xewerde yene, gherb elliridiki bezi eqil ambiri organlirining Uyghur rayonida keng-kölemlik mejburiy emgek mesilisi bar dégen doklati hemde bezi siyasiyonlarning Uyghur rayonidiki mejburiy emgek mesilisini otturigha qoyghinigha qarshi halda shinjang tereqqiyat tetqiqat merkizining mexsus mutexessislerni teklip qilip, Uyghur diyaridiki emgekchilerning ishqa orunlishish ehwalini tekshürüshke uyushturghanliqi bildürülgen bolup, bu "Tekshürüp tetqiq qilish guruppisi" Uyghur diyarining her qaysi jaylirida tekshürüsh élip bérish arqiliq héchqandaq jayda mejburiy emgek mesilisining yoqluqini, her millet ammisining öz ixtiyarliqi bilen ishqa orunlashqanliqini, hökümetning ulargha "Ishlesh, kesip tallash, igilik tiklesh erkinliki" bergenlikini delillep chiqqan.

Bu doklatta yene bezi sanliq melumatlar bérilgen bolup, "2014-Yildin 2019-yilghiche shinjangda kesip jehettin terbiyelen'genler 6 milyon 957 ming adem qétimgha, igilik tikligüchiler 379ming 400 ademge yetti. Hökümetning yardimi bilen shinjangdiki éshincha emgek küchliridin rayon atlap ishqa orunlashqanlar 16milyon 570 ming adem qétimgha yetti, buning ichide jenubiy shinjangdin ishqa orunlashqanlar 10milyon 700 ming adem qétimgha yetti" déyilgen.

Analizchilarning qarishiche, xitayning bu "Tekshürüsh doklati" diki sanliq melumatta Uyghurlarning sani éniq emes, uning toghriliqini üchinchi terep ispatliyalmaydu, ishqa orunlashqanlarning köpinchisining xitay köchmenliri ikenlikini chetke qaqqili bolmaydu. Xitay her da'im özining qilmishini özi aqlap, hetta uni "Ilmiy pakit" bilen niqaplashqa usta. Yene bir jehettin, bu doklat Uyghur rayonidiki lagérlar we mejburiy emgek mesilisi xelq'aragha ashkarilan'ghandin kéyin xitaygha xelq'aradin, bolupmu amérikadin bésim boluwatqanliqining ipadisi bolup, amérikada maqullinish aldida turghan "Uyghur mejburiy emgekning aldini élish qanuni" gha qarshi halda otturigha chiqqan teshwiqattin ibaret.

Toluq bet