Amérikidiki bir taratqu, xitayning Uyghurlarni yoqitishta dunyaning éghizini pul bilen étiwatqanliqini bildürdi

Muxbirimiz erkin
2018-08-10
Élxet
Pikir
Share
Print

Amérikidiki bir tor béti jüme küni maqale élan qilip, xitayning chet'eldiki Uyghurlarning a'ile ezalirigha qandaq ziyankeshlik qiliwatqanliqini tepsiliy weqeler bilen otturigha qoydi. Amérikidiki "Heqiqiy we éniq tekshürüsh" namliq torda élan qilin'ghan mezkur maqalida, erkin asiya radi'osi Uyghur bölümining mu'awin diréktori muhemmetjan jümening yurtidiki a'ile ezalirining béshigha kelgen hadisiler arqiliq xitay hökümitining Uyghur jem'iyiti we muhajirettiki Uyghurlargha qandaq bésim we ziyankeshliklerni qiliwatqanliqi yorutup bérilgen.

"Xitay Uyghurlarni ghayib qiliwétishta dunyani pul bilen süküt qildurmaqta" serlewhilik bu maqale amérikiliq zhurnalist, obzorchi we yazghuchi richard bérnishtéyn teripidin yézilghan. Maqalida, xitay hökümitining muhemmetjan jümening yurtidiki anisi we 3 achisi bilen bolghan pütün alaqisini üzüp tashlighanliqi, ikki inisining tutqun qilin'ghanliqi, ularning birining ürümchi 1‏-türmisige qamalghanliqi, yene bir inisining yighiwélish lagérigha élip kétilgen bolushi mümkinlikini tekitlen'gen. Maqalida qeyt qilinishiche, muhemmetjan jüme we erkin asiya radi'osidiki bashqa muxbirlarning Uyghur rayonidiki a'ile ezalirining ghayib bolushidek bu kechmishi xitayning basturushi uning chégrasidin halqip ötüp, dunyaning her qaysi jayliridiki Uyghur we bashqa az sanliq milletlerni kontrol qilishqa urunuwatqanliqini körsitip béridiken.

Maqalida yene xitayning pakistan, tayland, özbékistan, kambodzha, malaysiyadek döletlerge meblegh sélish arqiliq ularning éghzini étiwatqanliqi, b d t diki tesir küchidin paydilinip, Uyghur mesilisining b d t da otturigha qoyulushini tosuwatqanliqi otturigha qoyulghan. Maqalida amérikining b d t diki yardemchi bash elchisi kélléy kuriyning sözi neqil keltürülüp, uning "Xitay özining shinjangdiki qorqunchluq kishilik hoquq ziyankeshlikige qarshi herqandaq heriketlerni ünümlük tosup keldi" dégenlikini tekitligen. Maqalida, qeyt qilinishiche, erkin asiya radi'osidiki muxbirlarning a'ile ezalirining ehwali amérika tashqi ishlar ministiri mayk pompéyoning inkasini qozghighanliqi, uning 24‏-iyul küni "Bügünki amérika" gézitide maqale élan qilghanliqini eskertip, lékin u maqale élan qilip bir hepte ichide muhemmet jümening anisining téléfoni üzülgenliki we uning yene bir inisining ghayib bolghanliqi tekitlen'gen.

Toluq bet