Xitay aqsuning yerlik mehsulatlirini sherqiy-jenubiy asiya ellirige ékisport qilishni kücheytken

Washin'gtondin muxbirimiz erkin teyyarlidi
2024.02.23

Wiyétnam Uyghur mejburiy emgikige chétishliq mehsulatlarni amérikagha éksport qilishta xitaydin ‍éship ketken bir peytte, xitay da'iriliri aqsuning yerlik mehsulatlirini sherqiy-jenubiy asiya döletlirige éksport qilishni kücheytken.

Nöwette xitay taratquliri, aqsuning bu yil 1-ayda yerlik mehsulatlirini sherqiy-jenubi asiyadiki hindonéziyege éksport qilishta ‍ötken yilning oxshash mezgilidikidin 104 pirsent artqanliqini bildürmekte.

Xitayning yerlik mehsulatlarni éksport qilishta sherqiy-jenubiy asiya ellirige yüzlinishi, amérika chégra qoghdash we tamozhna idarisining yéqinda élan qilghan sanliq melumatida Uyghur mejburiy emgikige chétishliq éléktronluq buyumlar, kiyim-kéchek, toqumichiliq mehsulatlirini amérikagha éksport qilishta wéytnamning xitaydin éship ketkenliki melum bolghan bir peytte otturigha chiqqan.

Adriyan zénzge oxshash mutexessislerning körsitishiche, amérikaning tamozhna sanliq melumatliri xitayning Uyghur mejburiy emgikige chétishliq mehsulatlarni amérikagha éksport qilishta sherqiy-jenubiy asiya elliridin paydiliniwatqanliqini körsetmekte iken.

“Xitay xewerliri” torining 23-féwral bergen xewiride, aqsu tamozhna da'irilirining bu yil 1-ayning özide hindonéziyege éksport qilin'ghan aqsu yerlik mehsulatlirining 7500 tonnagha yetkenliki, omumiy qimmiti 96 milyon yüen bolghan bu mehsulatlarning éksporti ötken yilning oxshash mezgilidikidin 104 pirsent artqanliqini bildürgenliki qeyt qilinmaqta.

Xewerde, 3 yildin buyanqi tunji türkümdiki aqsu neshpütining sherqiy-jenubiy asiyagha qarap yolgha chiqqanliqi, bu neshpütlerning “Aqsu goshiyangyüen déhqanliq tereqqiyat shirkiti” qishliq iskilatida qachilan'ghanliqini bildürgen.

Xewerde yene aqsu tamozhna idarisining bir emeldarining bu yüzlinishni “Yaxshi bir bashlinish” dep teripligenliki qeyt qilinmaqta. Amérikadiki “Komunizim qurbanliri xatire fondi” ning aliy tetqiqatchisi ‍driyan zénzning yéqinda élan qilghan doklatida ashkarilishiche, 2017-yili bashlan'ghan Uyghur rayonidiki chong basturushta bezi jaylarda 90 pirsent yerlik déhqanning yéri tartiwélinip, xitay shirketlirige ötküzüp bérilgen iken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.