Хитайниң америкада турушлуқ баш әлчиси: «шинҗаңда лагер йоқ»

Мухбиримиз әркин
2019-05-22
Елхәт
Пикир
Share
Принт

Хитайниң америкида турушлуқ баш әлчиси сүй тйәнкәй америкадики бир телевизийә қанилиниң зияритини қобул қилип, уйғур районида лагерларниң мәвҗутлуқини инкар қилған.

Униң илгири сүрүшичә, уйғур районида лагер йоқ болуп, бу орунлар «кәспий маһарәт өгиниш мәркәзлири» икән. Сүй тйәнкәй 21‏-май күни «фокс хәвәрләр» телевизийә қанилиниң зияритини қобул қилип, сода уруши, лагерлар, җәнубий деңиз мәсилиси қатарлиқ соалларға җаваб бәргән. У лагерлар һәққидики юқириқи сөзләрни риясәтчиниң «әң һалқилиқ вә җиддий мәсилә хәлқара җәмийәт уйғур мусулман аз санлиқ миллитигә диққәт қилмақта. Ташқи мунасивәтләр кеңишиниң доклатида ‹лагерлардики мутләқ көпчилик кишиләр, тәхминән бир милйондәк уйғур һечқандақ җинайити йоқ, һечқандақ қануни капалити йоқ тутуп турулмақта. Уларниң бирдин бир җинайити пәқәт мусулман болғанлиқидур. . . . . . . Хитай әмәлдарлири бу орунларни кәспи маһарәт өгиниш мәркәзлири, уларниң кишилик һоқуқиға хилаплиқ қилинмиди, дәп ақлимақта' дейилгән. Бу орунларда бир милйондин артуқ мусулман тутуп турулуватамду?» дегән соалиға җаваб бәргәндә тәкитлигән. Сүй тйәнкәй өзиниң буниңдин 2-3 һәптә аввал уйғур районида зиярәттә болғанлиқини әскәртип: «у йәрдә лагер йоқ. Мән бәзи кәспий маһарәт мәркәзлирини зиярәт қилдим. Бу орунлар лагер әмәс, һәқиқий кәспий маһарәт мәркәзлиридур. Бу орунларниң дәрвазиси очуқ, қораллиқ қоғдиғучиси йоқ. Кишиләр һәр һәптә ахири өйигә кетәләйду» дегән. Униң илгири сүрүшичә, «шинҗаңдики һәқиқий хирис өткән йиллирида йүз бәргән террорлуқ һуҗумлар» икән. У хитайниң бу райондики сияситини ақлап, «бу хил террорлуқ һәрикәтлирини тохтитиш биз үчүн әң зор хирис иди. Биз әң яхши амалларни қилип, бу райондики һәр қайси милләтләрниң һаяти вә бихәтәрликини қоғдап кәлдуқ» дегән.

Сүй тйәнкәй америка-хитай сода уруши кәскинләшкән, шуниңдәк америка һөкүмити хитайниң 2 милйондәк уйғурни йиғивелиш лагерлириға қамап, уларниң мәдәнийити, тили, диний етиқадини чәкләш, уйғур җәмийитини омумйүзлүк тәқиб қилиштәк кишилик һоқуқ дәпсәндичиликини җазалаш һәққидә күчлүк бесимға учраватқан мәзгилдә «фокс хәвәрләр» қанилиниң зияритини қобул қилған.

Пикирләр (0)
Share
Толуқ бәт