Трамп һөкүмити хитай компартийәсиниң әзалири вә уларниң аилә-тавабиатлириға виза чәклимиси қоюшни ойлашмақтикән

Мухбиримиз ирадә
2020-07-16
Елхәт
Пикир
Share
Принт

Трамп һөкүмити хитайдики барлиқ компартийә әзалири вә уларниң аилә тавабиатлириға виза чәклимиси қоюшни ойлашмақтикән.

Президент трампниң әтрапидики йеқин кишиләрниң «ню-йорк вақти гезити» гә ейтишичә, трамп һөкүмитидикиләр бу қарар үстидә музакирә елип бериватқан болуп, әгәр бу қарар мақуллинип қалса, аллиқачан америкаға кирип болған хитай компартийәсиниң әзалири вә уларниң аилә-тавабиатлириниң визалири бикар қилинидилән, һәтта уларниң америкадин қоғлап чиқириветилиши мумкин икән.

«Ню-йорк вақти гезити» ниң ейтишичә, ақсарай, америка ташқи ишлар министирлиқи вә америка дөләт мудапиә министирлиқи әмәлдарлири юқириқи бу виза чәклимиси һәққидики муназиләргә иштирак қиливатқан икән. Әгәр бундақ кәң көләмдики виза чәклимиси һәқиқәтән ишқа киришсә, бу 2018-йили икки дөләт оттурисидики сода уруши башланғандин буян америка хитайға қаратқан қаратқан әң зор һәрикәтләрниң бири болуш билән биргә йәнә икки дөләт оттурисидики соғуқ урушиниң ярқин ипадиси болуп қалидикән.

Мәлум болушичә, хитайда 92 милйон нәпәр компартийә әзаси бар болуп, бу һәқтики музакириләрдә барлиқ компартийә әзалириға әмәс, бәлки алди билән хитай компартийәсиниң сиясәтлирини бәлгиләйдиған хитай компартийәси мәркизий комитети сиясий бюросиниң 25 нәпәр әзаси вә уларниң аилә тавабиатлириға виза чәклимиси қоюш алға сүрүлмәктикән.

Америка һөкүмити уйғур елидики зулумда рол алған чен чүәнго, җу хәйлун қатарлиқ 4 нәпәр хитай әмәлдарини «йәр шари магнетисий қануни» арқилиқ җазалиған. Чен чүәнго хитай компартийәси сиясий бюросиниң әзаси болуш сүпити билән һазирғичә җазаланған әң юқири дәриҗилик хитай әмәлдари болуп қалған. Америка ташқи ишлар министирлиқи алдинқи күнила уйғур елидики зулумға иштирак қилған хуавей қатарлиқ техника ширкәтлириниң хадимлириға виза чәклимиси елан қилған иди.

Пикирләр (0)
Share
Толуқ бәт