Хитай мәмликәтлик сиясий кеңәшниң муавин рәиси муддәтсиз қамақ җазасиға һөкүм қилинған

Бүгүн хитай даирилири хитай мәмликәтлик сиясий кеңәшниң сабиқ муавин рәиси су роңниң “парихорлуқ” җинайити билән әйиблинип, муддәтсиз қамақ җазасиға һөкүм қилинғанлиқини елан қилған.

Б б с ниң хитай һөкүмәт таратқулиридин нәқил кәлтүрүп хәвәр беришичә, су роң 2002-йилидин 2014-йилиғичә болған җәрянда һоқуқидин пайдилинип, 116 милйон йүән пара йегәнлики мәлум болған.

Хитай таратқулири су роңниң җинайитини етирап қилғанлиқини, сотниң һөкүмигә бой сунидиғанлиқини вә алий сотқа қайта әрз қилмайдиғанлиқини билдүргән.

Игилинишичә, су роң җов йоңкаңниң делосидин кейин, йәни хитай компартийәсиниң 18-қурултийидин кейин торға чүшкән “дөләт рәһбири” дәриҗисидики әмәлдар икән.

Су роң хитайниң җилин өлкисидин өскән болуп, 1992-йили у 44 йешида муавин министир дәриҗилик әмәлдар болған икән. Шуниңдин кейин у пәләмпәйсиман юқириға өрләп, илгири-кейин чиңхәй, гәнсу вә җяңши өлкилик парткомларниң секретари болған. Бир мәзгил хитай мәркизий партийә мәктипиниң муавин мудирлиқ вәзиписини өтигән. 2013-Йили хитай мәмликәтлик сиясий кеңәшниң муавин рәисликигә тәйинлинип, “дөләт рәһбири” сепигә киргән икән.

Хитай таратқулири су роңниң җов йоңкаң гуруһи билән йеқин мунасивити барлиқини ишарә қилмақтикән.