Uyghur diyarigha yötkep kélin'gen xitay emeldarining wezipisi aydinglashti

2019-02-27
Élxet
Pikir
Share
Print

Yéqinda xitayning jilin ölkisi changchün shehirining sabiq partkom sékrétari wang jünjéngning Uyghur aptonom rayonigha yötkep kélinishtiki sewebi aydinglashqan.

Uning ikki hepte awwal tuyuqsiz aptonom rayonluq partkomning da'imiy ezaliqigha yötkep kélinishi her xil gumanlarni qozghighan idi.

Beziler uning Uyghur aptonom rayonluq partkom sékrétari chén chüen'goning ornigha olturushi mumkinlikini ilgiri sürgen idi. Lékin xongkongdiki "Jenubiy xitay etigenlik pochtisi" gézitining 27‏-féwral xewer qilishiche, wang jünjéng Uyghur aptonom rayonluq siyasiy-qanun komitétining sékrétari ju xeylunning wezipisini ötküzüwalghan. U 25‏-féwral küni siyasiy-qanun komitétining omumi yighinigha riyasetchilik qilghan. Ju xeylun bu yil 1‏-ayda Uyghur aptonom rayonluq xelq qurultiyining mu'awin mudirliqigha yötkilip, uning orni bosh qalghan idi.

Közetküchilerning qarishiche, xitay hökümitining ju xeylunni siyasi-qanun sépidin yiraqlashturup, uning ornigha wang jünjéngni yötkep kélishi uni xelq'araning közidin yiraq tutushni meqset qilghan bolushi mumkin iken.

Ju xeylun 2 milyondek Uyghur, qazaq we bashqa musulman xelqlerning yighiwélish lagérlirigha qamilishi we iz-déreksiz ghayib bolushida asasliq jawabkarlarning biri dep qarilip, amérika hökümitining jazalishi telep qiliniwatqan shexs. Amérika dölet mejlisining ezaliri ötken yili prézidént trampqa xet yézip, uninggha émbargo qoyushni telep qilghan idi.

"Jenubiy xitay etigenlik pochtisi" gézitining xewiride tekitlinishiche, wang jünjéngning wezipisi Uyghur rayonida partiyening mutleq rehberlikige kapaletlik qilish iken. U 25‏-féwral ötküzülgen yighinda "Partiyening siyasiy-qanun sépidiki mutleq rehberlikige kapaletlik qilish, partiye merkizi komitétining shinjangni bashqurush istratégiyesini qet'iy ijra qilish" ni tekitligen.

"Jenubiy xitay etigenlik pochtisi" gézitining bildürüshiche, közetküchiler wang jünjéng xitayning Uyghur rayonidiki qattiq kontrolluq siyasitide héchqandaq özgirish peyda qilmaydu, dep qaraydiken.

Toluq bet