Uyghur aptonom rayonida turushluq xitay jasusluq orginining bashliqi wezipisidin qalduruldi

Muxbirimiz erkin
2015-05-29
Share

Xitayning Uyghur aptonom rayonida turushluq jasusluq orgini- dölet xewpsizlik nazaritining nazariti déng yung wezipisidin qaldurulghan.

Déng yungning wezipisidin qaldurulushigha qandaq amil seweb bolghanliqi, uning bashqa orun'gha yötkelgenliki yaki bashqa alahide bir seweb barliqi melum emes.

Uyghur aptonom rayonluq 12‏-nöwetlik xelq qurultiyining 16‏-omumiy yighini 28‏-may küni élan qilghan axbaratida, déng yungning wezipisidin qaldurulghanliqini bildürgen. Aptonom rayonluq xelq qurultiyi shu küni memuri, teptish, sot, qanun chiqirish organliridiki wezipisidin qaldurulghan we wezipe almashturghan emeldarlarning tizimlikini élan qilghan.

Déng yung xitay dölet bixeterlik sistémisi jiddiy tertipke séliniwatqan mezgilde wezipisidin qalduruldi. Xitay tor xewerlirining ashkarilishiche, yéqinda xitay dölet bixeterlik ministiri géng xuychang wezipisidin qaldurulup, ornigha merkizi intizam tekshürüsh komitétining mu'awin sékrétari chén wénching qoyulghan. Shuning bilen birge, da'iriler shangxey, guyju dölet bixeterlik nazaritining nazirlirini wezipisidin élip tashlighan.

Déng yung 2010‏- yili 10‏-aydin buyan Uyghur aptonom rayonluq dölet bixeterlik nazaritining naziri we partkom sékrétarliq wezipisini atqurup kelgen. U wezipe atqurghan bu mezgil Uyghur ilida qarshiliq herikiti eng kücheygen mezgil bolup qalghan idi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet