Ши җинпиңниң парихорлуққа қарши күрәштә нишан йөткиши диққәт қозғиди

Мухбиримиз шөһрәт һошур
2015.12.28

Хитайниң мәркизи интизам тәкшүрүш комитети бүгүн хитай телеграф ширкитиниң баш директори чаң шявбиңниң интизамға еғир хилаплиқ қилиш гумани билән тәкшүрүлүватқанлиқини елан қилған.

Бүгүн бу һәқтә америка авази радиосиға пикир баян қилған хоңкоңдики җуңго тили университетиниң профессори лин хелин “бу парихорлуққа қарши күрәштә нишанниң партийә вә һөкүмәт әмәлдарлиридин дөләт вә хусуси игиликтики карханиларниң башлиқлириға йөткилишидур” дегән.

Лин хелинниң қаришичә, 2017-йили хитай компартийисиниң 19-қурултийи ечилиду, ши җинпиң бу қурултай ечилғучә арилиқта йәнә көплигән чоң әмәлдарларни йоқитивәткүси йоқ, шуңа у 4-йилиға қәдәм қоюш алдида турған парихорлуққа қарши нишанни дәсләпки икки йилда партийә-һөкүмәт әмәлдарлириға қаратқан болса, әмди кархана вә ширкәт башлиқлириға қаратқан. Профессор лин хелинниң қаришичә, ши җинпиң бу хил нишан йөткәш арқилиқ партийә вә һөкүмәтниң ички иттипақлиқиға чоң дәз кетиштин сақланмақчи.

Америка авазиниң бүгүнки бу һәқтики хәвиридә, хитайда парихорлуқниң сақаймас бир кесәллики, ши җинпиң елип бериватқан парихорлуққа қарши һәрикәтниң әмәлийәттә ши җинпиңниң өз сиясий рәқиблирини тазилаш һәрикити икәнлики әскәртилгән.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.