Ши җинпиңниң орунбасари дәп қаралған бир хитай әмәлдар җазаға тартилған

Мухбиримиз җүмә
2017-09-30
Share

Хитай рәиси ши җинпиңниң орунбасари болуп қелиши мумкин, дәп қаралған чуңчиң шәһириниң сабиқ башлиқи сун җеңсәй җүмә күни хитай компартийәсидин қоғлап чиқирилип, қанун органлириниң бир тәрәп қилишиға тапшурулған.

Чуңчиң шәһириниң партком секретари, хитай сиясий бюроси әзаси сун җеңсәй 15-июл туюқсиз вәзиписидин қалдурулуп, мәркизий интизам тәкшүрүш комитетиниң тәкшүрүшигә тапшурулған.

"тәңритағ" ториниң хәвәр қилишичә у, "ғайә, етиқадта тәвринип, партийиниң асасий мәқситидин йүз өрүгән", "һоқуқини суйиистемал қилған" вә "чирикләшкән" икән.

Сун җеңсәй хитай мәркизий сиясий бюросидики әң нопузлуқ 25 әзаниң бири икән. Вал стрет журнили гезитидә берилгән мулаһизигә қариғанда, анализчилар вә хитай компартийисиниң ички ишлиридин хәвәрдар кишиләр сунниң кәлгүсидә сиясий бюро даимий комитетиға өстүрүлүп, хитай рәиси ши җинпиңниң орниға чиқиши мумкинлики наһайити юқири болған бири икәнликини билдүрүшкән.

Хәвәрдә көрситишичә, йәнә бир нөвәт хитайға рәис болушни көзләватқан ши җинпиң партийә рәһбәрлики ичидики өзигә риқабәтчи болалайдиған кишиләрни мәркәздин йирақлаштурушқа тиришмақта икән.

Ши җинпиңниң сун җеңсәйни вәзиписидин қалдуруши, униң 2020-йили 2-қарар рәислик муддити тошқандин кейинму һоқуқни чаңгилида тутуп турушни көзләватқанлиқидин дерәк беридикән. Сунниң орниға ши җинпиңниң қәдинас тости, гуйҗу өлкисиниң партийә секретари чен минер тәйинлигән.

Чуңчиң хитайдики мәркәзгә биваситә қарашлиқ 4 чоң шәһәрниң бири. Сун җеңсәй ши җинпиң һакимийити дәвридә мәзкур шәһәрниң партком секретарлиқ вәзиписини атқуруш давамида моллақ атқан иккинчи шәхс. Чуңчиңниң сабиқ партком секретари бо шиләйму 2012-йили "чириклик" вә "һоқуқни қалаймиқан ишлитиш" җинайәтлири билән әйиблинип, муддәтсиз қамақ җазасиға һөкүм қилинған. Сун җеңсәй 2012-йили ноябиридин башлап мәзкур шәһәргә вәзипигә тәйинләнгән иди.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт