Shi jinpingning orunbasari dep qaralghan bir xitay emeldar jazagha tartilghan

Muxbirimiz jüme
2017-09-30
Share

Xitay re'isi shi jinpingning orunbasari bolup qélishi mumkin, dep qaralghan chungching shehirining sabiq bashliqi sun jéngsey jüme küni xitay kompartiyesidin qoghlap chiqirilip, qanun organlirining bir terep qilishigha tapshurulghan.

Chungching shehirining partkom sékrétari, xitay siyasiy byurosi ezasi sun jéngsey 15-iyul tuyuqsiz wezipisidin qaldurulup, merkiziy intizam tekshürüsh komitétining tekshürüshige tapshurulghan.

“Tengritagh” torining xewer qilishiche u, “Ghaye, étiqadta tewrinip, partiyining asasiy meqsitidin yüz örügen”, “Hoquqini suyi'istémal qilghan” we “Chirikleshken” iken.

Sun jéngsey xitay merkiziy siyasiy byurosidiki eng nopuzluq 25 ezaning biri iken. Wal strét zhurnili gézitide bérilgen mulahizige qarighanda, analizchilar we xitay kompartiyisining ichki ishliridin xewerdar kishiler sunning kelgüside siyasiy byuro da'imiy komitétigha östürülüp, xitay re'isi shi jinpingning ornigha chiqishi mumkinliki nahayiti yuqiri bolghan biri ikenlikini bildürüshken.

Xewerde körsitishiche, yene bir nöwet xitaygha re'is bolushni közlewatqan shi jinping partiye rehberliki ichidiki özige riqabetchi bolalaydighan kishilerni merkezdin yiraqlashturushqa tirishmaqta iken.

Shi jinpingning sun jéngseyni wezipisidin qaldurushi, uning 2020-yili 2-qarar re'islik mudditi toshqandin kéyinmu hoquqni changgilida tutup turushni közlewatqanliqidin dérek béridiken. Sunning ornigha shi jinpingning qedinas tosti, guyju ölkisining partiye sékrétari chén min'ér teyinligen.

Chungching xitaydiki merkezge biwasite qarashliq 4 chong sheherning biri. Sun jéngsey shi jinping hakimiyiti dewride mezkur sheherning partkom sékrétarliq wezipisini atqurush dawamida mollaq atqan ikkinchi shexs. Chungchingning sabiq partkom sékrétari bo shileymu 2012-yili “Chiriklik” we “Hoquqni qalaymiqan ishlitish” jinayetliri bilen eyiblinip, muddetsiz qamaq jazasigha höküm qilin'ghan. Sun jéngsey 2012-yili noyabiridin bashlap mezkur sheherge wezipige teyinlen'gen idi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet