“Xitay-ereb döletliri hemkarliq munbiri 10-nöwetlik ministir derijilikler yighini” béyjingda bashlan'ghan

Washin'gtondin muxbirimiz irade teyyarlidi
2024.05.30

Isra'iliye-pelestin urushi keskinliship, ottura sherqte weziyet jiddiylishiwatqan bir peytte, xitay ottura sherqtiki ereb döletlirining rehberliri bilen yighin chaqirip, öz'ara hemkarliqni chongqurlashturushni muzakire qilghan.

Xitayning hökümet taratquliri tarqatqan xewirige qarighanda, “Xitay-ereb döletliri hemkarliq munbiri 10-nöwetlik ministir derijilikler yighini” 5-ayning 30-küni béyjingda bashlan'ghan bolup, bu yighin'gha xitay kompartiyesining bash sékrétari shi jinping biwasite qatnashqan hem échilish sözi qilghan.

Shi jinping yighindiki sözide pelestin mesilisini mexsus tilgha élip, pelestindiki urushning derhal ayaghliship, tinchliqning berpa qilinishi lazimliqini tekitligen. Shuning bilen birge, xitayning musteqil pelestin dölitining qurulushini qollaydighanliqini éytqan.

Melum bolushiche, shi jinping yene xitay bilen ereb döletliri ara munasiwetning yéngi dewrge qedem qoyghanliqini medhiyelesh bilen birge yene, uni “Dunyaning tinchliqi we muqimliqini qoghdashning ülgisi” dep körsetken.

Xitayning ottura sherqtiki weziyet keskinlishiwatqan, bolupmu amérika baydén hökümitining isra'iliyeni qollishi sewebidin ottura sherqte amérikagha qarshi naraziliq küchiyiwatqan bir peytte, ereb elliri bilen yéqinlishishi diqqet qozghimaqta.

CNN Téléwiziyesining bu heqtiki xewiride déyilishiche, “Xitay hökümiti pelestindiki bu toqunushni washin'gton'gha zerbe bérish üchün ishletken, amérikaning isra'iliyeni qollishini tutqa qiliwélip, uni dunya tertipige hökümranliq qilishqa uruwatqan tajawuzchi qilip körsitishke urunmaqtiken.”

Xitayning hökümet taratquliri, xitay tashqi ishlar ministiri wang yining ereb döletliri tashqi ishlar ministirliri bilen ortaq halda “Pelestin mesilisi toghrisida birleshme bayanat” maqullighanliqini xewer qilghan, emma xewerde kélishimning mezmuni élan qilinmighan.

Béyjingdiki bu yighin'gha 22 ereb dölitining tashqi ishlar ministirliri qatnashqan bolup, buningdin sirt yene misir pirézidénti abdul-fatax el sisi, ereb birleshme xelipilikining re'isi muhemmed bin zeyid el nehyan, behreyin padishahi hamad bin isa el xelife we tunis pirézidénti keys seyid qatarliqlarmu dölet ziyariti üchün hazir xitayda iken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.