Xitay hökümiti ereb döletliri wekillirini “Shinjang teshwiqati” ni qilishqa chaqirdi

Xitay hökümiti Uyghurlargha qarshi yürgüzüwatqan irqiy qirghinchiliq we insaniyetke qarshi jinayetlirini yoshurush we aqlashqa da'ir teshwiqatlirida islam ellirini nuqtiliq nishan qiliwatqanliqi melum bolmaqta.

Xitayning “Tengritagh tori” din bérilgen xewerdin melum bolushiche, Uyghur aptonom rayonluq partkomning sékrétari ma shingrüy 27-mart küni ürümchide bir qisim ereb döletlirining “Siyasiy partiyeler kadirlar tekshürüsh ömiki” wekillirini kütüwalghan. Melum bolushiche, bu ömekte iraq, mawritaniye, iyordaniye, pelestin, marakesh, tunis, yemen qatarliq döletlerdin kelgen siyasiy partiye wekilliri bar iken.

Xewerde éytishiche, ma shingrüy bu wekillerge shi jinping bashchiliqidiki xitay kompartiyesi merkizi komitétining “Shinjanggha ghemxorluq qilishi bilen ghayet zor netijiler qolgha kelgenliki, emma amérika qatarliq gherb döletliridiki bir qisim küchlerning aq-qarini astin-üstün qilip, millet, din, kishilik hoquq qatarliq sahelerde yalghan-yawidaq sözlerni tarqitip, xitayning tereqqiyatini tosmaqchi boluwatqanliqi” ni bildürgen. Ma shingrüy sözining axirida “Bu ömektikilerning ziyaret we ékskursiyeliri dawamida shinjangning ehwalini choqum téximu etrapliq we chongqur chüshinip, xelq'ara jem'iyetke tinch-inaq, hayatiy küchke tolghan güzel shinjang hékayisini sözlep bérishini qarshi alimiz” dégen.

Xewerde ilgiri sürülüshiche, bu qétim ziyaretke kelgen ereb döletliri siyasiy partiyeler wekiller tekshürüsh ömiki terkibidiki ömek bashliqi, pelestin fatax inqilabiy komitétining ezasi bassam zakarni, süriyening sabiq memuriy tereqqiyat ishliri dölet ishliri ministiri, süriye kommunistik partiyesi (baghdash terepdarliri) siyasiy biyurosining ezasi abdulla xélil, liwan sotsiyal tereqqiyperwerler partiyesining mu'awin re'isi hebibe o'én, misir kommunistik partiyesi merkiziy komitétining ezasi se'id abdulla zayir, pelestin xelq küresh fironti siyasiy biyurosining bash katipi muhemmet alush qatarliqlarmu tushmutushtin söz qilghan. Ular sözliride xitay kompartiyesining “Shinjangda iqtisadiy tereqqiyatta mislisiz ilgirileshlerni qolgha keltürgenlikini, her millet xelqi bextiyar hayat ichide diniy étiqad erkinlikidin toluq behrimen boluwatqanliqini, amérika we bashqa gherb döletlirining shinjang siyasitini bahane qilip xitaygha qara chaplishining asasi yoqluqini, özlirining choqum shinjangning emeliy ehwalini keng teshwiq qilidighanliqini” bildürgen.

Xitay hökümiti yéqinqi mezgillerde özlirining xelq'araliq obrazini téximu yaxshilash üchün “Shinjang heqqidiki hékayilerni yaxshi sözlesh” teshwiqatini keng qanat yayduruwatqanliqi melum. Nöwette buning bir türlük mezmuni del mushu xildiki hökümet teshkilligen ziyaretler boluwatqan bolup, buninggha ereb-islam döletlirining her sahe kishilirini qatnashturushi teklip qilish “Uyghurlargha qaritilghan zulumni yoshurush urunushi” dep qaralmaqta.