Хитайда йеза хәлқи 8 яшлиқ әйдиз балини йезидин қоғлап чиқиришни тәләп қилған

Мухбиримиз ирадә
2014.12.18
Share on WhatsApp
Share on WhatsApp


Сичуән өлкисигә қарашлиқ бир йезидики 200 дин ошуқ амма бирликтә йезилиқ һөкүмәткә хәт йезип, йезидики 8 яшлиқ әйдиз юқумланғучиси балини қоғлап чиқиришни тәләп қилған. Мәзкур вәқә учур вастилири арқилиқ тарқалғандин кейин җәмийәттә күчлүк инкас қозғиди.

Фирансийә агентлиқиниң хәвәр қилишичә, бу хәткә имза қойғанлар ичидә бу өсмүр балиниң бовисиму бар икән. Күнкүн исимлик бу бала вирусни аписидин юқтурувалған болуп, униң аписи 2006 - йили йезини ташлап чиқип кәткән, күнкүнниң дадисиму балисиниң әйдиз икәнликини уққандин кейин уни ташлап “ғайип” болуп кәткән. Күнкүн мәктәп йешиға тошқанда йезидики башланғуч мәктәп уни мәктәпкә қобул қилмиған, йезидики кишиләрму униңдин өзини тартип йүргән.

Мәзкур вәқә, хитайдики әйдиз бимарлириниң җәмийәт тәрипидин йетим қалдурулуш, кәмситилишкә учраштәк вәзийитиниң бир типик мисали, дәп қаралмақта. Әйдиз бимарлириниң һоқуқини қоғдаш хизмити билән шуғуллиниватқан әй җишиң тәшкилатиниң паалийәтчилиридин таң әпәнди фирансийә агентлиқи мухбириға бундақ кәмситишниң хитай пуқралириниң әйдизгә болған көз қаришиниң төвәнликидин келип чиқиватқанлиқини, болупму йезиларда кишиләрниң бу җәһәттә интайин саватсизлиқини билдүргән.

Хитай дөләтлик сәһийә вә пиланлиқ туғут комитети бу айниң бешида елан қилинған ситатестикидин қариғанда, хитайда әйдиз билән юқумланған дәп диагноз қоюлғанларниң сани 497 миң нәпәр икән. Дәрвәқә мәктәп, дохтурхана, хизмәт орунлири қатарлиқ һәммила йәрдә уларға қаритилған кәмситиш сәвәбидин әйдиз бимарлириға диагноз қоюш вә уларни давалаш ишлири қаттиқ қейинчилиққа учрайдикән.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.