Хитайда бу йиллиқ әскәр елиш тәйярлиқ хизмити җиддий қанат яйдурулмақтикән

Игилинишичә, хитай дөләт мудапиә министирлиқи әскәр қобул қилиш ишханиси йеқинда “2017-йиллиқ әскәр елиш тәйярлиқ хизмити тоғрисида уқтуруш” елан қилған. Уқтурушта бу йиллиқ әскәр елиш тәйярлиқ хизмитиниң омумйүзлүк башланғанлиқи билдүрүлгән.

Хәлқ ториниң бу һәқтики мәхсус хәвиригә қариғанда, хитай дөләт мудапиә министирлиқи әскәр қобул қилиш ишханиси 10-январдин башлап мәмликәт бойичә әскәр елиш торини ечивәткән.

Уқтурушта көрситилишичә, хитайдики 18 яшқа тошқан әр пуқралар бу йил 6-айниң 30-күнидин бурун әскәр қобул қилиш ториға чиқип өз ихтиярлиқи билән һәрбий мәҗбурийәт өтәшкә тизимлатса болидикән.

Игилинишичә, йеқинқи йиллардин буян хитай һөкүмити армийәни заманивийлаштуруш, әскәрләрниң уруш қилиш иқтидарини күчәйтиш шундақла бүгүнки мурәккәп хәлқара вәзийәттә һәрбий үстүнлүкни сақлаш шоари билән һәрбий селинмисини йилсери ашурмақтикән.

Болупму хитайниң өткән йилиниң ахиридин буян японийә, тәйвән вә шәрқий җәнубий асиядики қошна әлләр билән болған мунасивитиниң җиддийлишиши, америкиниң хитайниң җәнубий деңиздики һәрбий һәрикәтлиригә қарита қаттиқ позитсийәдә болуши сәвәблик, хитай әскирий һазирлиқлирини күчәйтишкә башлиған.

Көзәткүчиләрниң билдүришичә, хитай бу йилдин башлап әскәрликкә тизимлитидиған яшларни техиму зор тәминатлардин мәнпәәтләндүрүш, уларниң аилә тавабиатлирини сиясий вә иқтисадий җәһәттики әвзәлликләрдин бәһриман қилиш чарисини йолға қоюши мумкинкән.