Хитай һөкүмитиниң вануатуда һәрбий база қурмақчи болуши зор ғулғула қозғиди

Мухбиримиз әзиз
2018-04-10
Елхәт
Пикир
Share
Принт

Хитай һөкүмитиниң окянийәниң җәнубий қисмидики вануату тақим араллири дөлитидә һәрбий база қурмақчи болуватқанлиқи һәққидики хәвәрләр тарқалғандин кейин, һәрқайси дөләтләр буниңға охшаш болмиған инкас қайтурди. Буниң билән хәлқарада хитайниң тинч окянда зомигәрлик қиливатқанлиқи һәққидә көпләп муһакимиләр оттуриға чиқти.

Ройтерс агентлиқиниң 10-апрелдики хәвиридә ейтилишичә, австралийә ахбарат васитилири хитайниң вануатуда һәрбий база қурмақчи болуватқанлиқи һәққидики мәлуматларни елан қилғандин кейин, вануату һөкүмити дәрһалла бу хәвәрни инкар қилған вә «биз хитайдин зор миқдардики һул муәссәсә мәблиғи еливатқан болсақму бундақ һәрбий база һәққидә гәп болғини йоқ» дегән.

Фирансийә бирләшмә агентлиқиниң хәвиридә ейтилишичә хитай өткән икки йилда вануатуға икки милярд америка доллириға йеқин малийә ярдими бәргән икән.

Хитай һөкүмити бу һәқтики соалларға қарита: «бу пүтүнләй ойдурма хәвәр» дәп җаваб бәргән. Австралийә вә йеңи зеландийә һөкүмәтлири бу һәқтә тохтилип: «биз һәрқандақ бир чәтәл дөлитиниң тинч окянниң җәнубидики бу даиридә яки бизгә қошна болған җайларда һәрбий база қурушиға қарши туримиз» дегән.

Мәлум болушичә, хитайниң чәтәлдики тунҗи һәрбий базиси 2017-йили африқа тумшуқидики җибутида ечилған болуп, хитай һөкүмити изчил буниң һәрбий база әмәслики, униң пәқәт арқа сәп муәссәсиси икәнликини қәйт қилип келиватқанлиқи мәлум.

Хитай һөкүмити өткән йилдин буян җәнубий хитай деңизи вә униңға йеқин җайларда җиддий һәрбий әслиһәләр қурулушини давам әттүрүватқан болуп, бу һал изчил қошна дөләтләрниң йеқиндин көзитишидә болуп кәлмәктә.

Пикирләр (0)
Share
Толуқ бәт