Xitay hökümitining wanu'atuda herbiy baza qurmaqchi bolushi zor ghulghula qozghidi

Muxbirimiz eziz
2018-04-10
Élxet
Pikir
Share
Print

Xitay hökümitining okyaniyening jenubiy qismidiki wanu'atu taqim aralliri dölitide herbiy baza qurmaqchi boluwatqanliqi heqqidiki xewerler tarqalghandin kéyin, herqaysi döletler buninggha oxshash bolmighan inkas qayturdi. Buning bilen xelq'arada xitayning tinch okyanda zomigerlik qiliwatqanliqi heqqide köplep muhakimiler otturigha chiqti.

Roytérs agéntliqining 10-apréldiki xewiride éytilishiche, awstraliye axbarat wasitiliri xitayning wanu'atuda herbiy baza qurmaqchi boluwatqanliqi heqqidiki melumatlarni élan qilghandin kéyin, wanu'atu hökümiti derhalla bu xewerni inkar qilghan we "Biz xitaydin zor miqdardiki hul mu'essese meblighi éliwatqan bolsaqmu bundaq herbiy baza heqqide gep bolghini yoq" dégen.

Firansiye birleshme agéntliqining xewiride éytilishiche xitay ötken ikki yilda wanu'atugha ikki milyard amérika dollirigha yéqin maliye yardimi bergen iken.

Xitay hökümiti bu heqtiki so'allargha qarita: "Bu pütünley oydurma xewer" dep jawab bergen. Awstraliye we yéngi zélandiye hökümetliri bu heqte toxtilip: "Biz herqandaq bir chet'el dölitining tinch okyanning jenubidiki bu da'iride yaki bizge qoshna bolghan jaylarda herbiy baza qurushigha qarshi turimiz" dégen.

Melum bolushiche, xitayning chet'eldiki tunji herbiy bazisi 2017-yili afriqa tumshuqidiki jibutida échilghan bolup, xitay hökümiti izchil buning herbiy baza emesliki, uning peqet arqa sep mu'essesisi ikenlikini qeyt qilip kéliwatqanliqi melum.

Xitay hökümiti ötken yildin buyan jenubiy xitay déngizi we uninggha yéqin jaylarda jiddiy herbiy esliheler qurulushini dawam ettürüwatqan bolup, bu hal izchil qoshna döletlerning yéqindin közitishide bolup kelmekte.

Toluq bet