Дөләт мәҗлиси хитай армийәси билән мунасивәтлик, дәп қаралған бир университетни тәкшүрмәктә

Мухбиримиз җүмә
2017-04-29
Елхәт
Пикир
Share
Принт

Америка дөләт мәҗлиси хитай азадлиқ армийәси билән четишлиқи болуши мумкин, дәп қаралған америкидики бир университет үстидин тәкшүрүш башлиған.

Фокс хәвәрләр торида көрситилишичә, «башқуруш вә технологийә университети» дәп аталған мәзкур университет виригинийә штатиға җайлашқан болуп, нөвәттә университет мудири чен йәнпиң фрәйм вә униң ери җ давидсон фрәйм тәкшүртмәктә икән.

Хәвәргә қариғанда университет мудири чен йәнпиң әсли хитай азадлиқ армийәсидә полковник дәриҗилик әмәлләрни тутқан сабиқ һәрбий икән. Униңдин башқа, униң дадиси чен бинму аталмиш«25 миң йоллуқ узун зәпәр» гә қатнашқан вә генераллиққичә өстүрүлгән кона коммунист икән.

Мәзкур мәктәпниң хитай азадлиқ армийәси билән мунасивити болуши мумкинлики гуман қилинғандин кейин, америка федератсийә тәкшүрүш идариси (FBI) 2012 - мәктәпкә бесип кирип тәкшүргән.

Һалбуки, намәлум сәвәбләр билән мәктәпниң мунасивәтлик рәһбәрлирини сотқа тартиш ишлири рояпқа чиқмиған.

Фокс хәвәрләр торида нәқил елишичә, бу һәқтә тохталған америка дөләт мәҗлиси тәптиш комитети рәиси җәйсон чәйфитз: «буниңдин ис чиқмиғандәк көрүнгини билән, әмма бу йәрдә өчүрүлмисә болмайдиған бир от барлиқ ениқ. Бәзиләр бу соалларға җаваб бериши керәк» дегән.

Мәлум болушичә, америка дөләт мудапиә министирликиниң мәбләғ ярдимигә еришкән бу мәктәпниң асаслиқ оқуғучилири вәзипидики яки сабиқ һәрбий хадимлар болуп, улар тор арқилиқ дәрс елип унванға еришидикән.

Бу һәқтә тохталған җәймставн фонди җәмийитидики тәтқиқатчи петир маттис, көплигән америка әскәрлиригә мунасивәтлик санлиқ мәлумат амбириға игә бундақ мәктәпләр хитай һәрбий даирилири әлвәттә қизиқтуриду, дегән.

Мәлум болушичә, дөләт мәҗлиси тәптиш комитети рәиси чәйфитз 12 - апрел дөләт мудапиә министири җәймис маттисқа йоллиған хетидә мәзкур мәктәпкә тизимлатқан һәрбий хадимларниң шәхсий учурлириниң хәтәр астида икәнликни агаһландурған.

Фокс хәвәрләр торида көрситишичә, 2012 - декабирда FBI мәзкур мәктәпкә вә мәктәп мудири чен йәнпиң фрәйм вә давидсон фрәймниң өйигә икки қетим бастуруп кирип тәкшүргән.

Хәвәрдә көрситишичә, һәр иккила қетимлиқ тәкшүрүш мәхпийәтлик дәриҗиси әң юқири ишпийонлуққа қарши тәкшүрүшкә алақидар икән.

Пикирләр (0)
Share
Толуқ бәт