Хитай һөкүмити җәнубий хитай деңизида башқурулидиған бомба системиси орунлаштурған

Мухбиримиз әзиз
2018-05-03
Елхәт
Пикир
Share
Принт

Америка истихбарат орунлириниң мәлуматлириға қариғанда, хитай һөкүмити земин даваси қилип келиватқан җәнубий хитай деңизи тәвәсидики үч қаравуллуқ орниға парахотқа қарши башқурулидиған бомба вә йәрдин һаваға қоюп берилидиған башқурулидиған бомба системилири орнатқан.

Ройтерс агентлиқиниң 3-майдики хәвиригә қариғанда, хитай һөкүмити бу тоғрилиқ сөз қилип, «бизниң бу җайларда башқурулидиған бомба системиси бәрпа қилишимиз һечқандақ дөләтни нишан қилғини йоқ. Бу пүтүнләй өзимизни мудапиә қилиш еһтияҗини чиқиш қилған,» дегән. Һалбуки, өткән айда америка деңиз армийәсиниң тинч окян қисимлириниң баш қомандани филип девидсон хитайниң җәнубий хитай деңизидики база кеңәйтиш һәрикитини америкиниң мәзкур райондики мәвҗутлуқи үчүн хирис пәйда қилиду, дәп көрсәткән. Шундақла буни «хитайниң һазир пәқәт әскәр йөткимигән йерила қалди,» дәп тәкитлигән иди.

3-Май күни ақ сарай бу мәсилә һәққидә җиддий инкас қайтуруп хитайниң бу хилдики һәрбийләштүрүш қилмишини агаһландурған. Ақ сарайниң бу һәқтики агаһландурушида хитай һөкүмитиниң бу қилмишиниң «қисқа мәзгиллик вә узақ мәзгиллик ақивәткә сәвәбчи» болидиғанлиқи алаһидә тәкитләнгән.

Мәлум болушичә, хитайниң бу йосунда бәрпа қилған һәрбий базилири һәрқачан башқа дөләтләрниң һәрбий қисимлирини нишан қилип кәлмәктә икән. Хитайниң чәтәлдики һәрбий базилириниң бири африқидики җибутиға җайлашқан болуп, «җәнубий хитай әтигәнлик гезити» ниң 3-майдики хәвиридә ейтилишичә, бу җайдин учуп өткән америка айропиланлири охшаш болмиған «лазер нурлуқ паракәндичилик» кә дуч кәлгән. CNN Ниң бүгүнки хәвиридә болса бу хил «лазер нур паракәндичилики» дә бир қисим америка учқучилириниң яриланғанлиқи ейтилған.

«Вал-стрет журнили» гезитиниң 3-майдики хәвиридә ейтилишичә, бәш бурҗәклик бинадики алақидар хадимлар бу һәқтә инкас қайтуруп, «бу хилдики айропиланларни күчлүк лазерлиқ нур арқилиқ паракәндә қилиш һадисиси шүбһисизки тасадипий оттуриға чиқип қалған әмәс. Бизниңчә бу америка үчүн хирис вә паракәндичилик,» дегән.

Пикирләр (0)
Share
Толуқ бәт