Xitay hökümiti jenubiy xitay déngizida bashqurulidighan bomba sistémisi orunlashturghan

Muxbirimiz eziz
2018.05.03
Share on WhatsApp
Share on WhatsApp

Amérika istixbarat orunlirining melumatlirigha qarighanda, xitay hökümiti zémin dawasi qilip kéliwatqan jenubiy xitay déngizi tewesidiki üch qarawulluq ornigha paraxotqa qarshi bashqurulidighan bomba we yerdin hawagha qoyup bérilidighan bashqurulidighan bomba sistémiliri ornatqan.

Roytérs agéntliqining 3-maydiki xewirige qarighanda, xitay hökümiti bu toghriliq söz qilip, “Bizning bu jaylarda bashqurulidighan bomba sistémisi berpa qilishimiz héchqandaq döletni nishan qilghini yoq. Bu pütünley özimizni mudapi'e qilish éhtiyajini chiqish qilghan,” dégen. Halbuki, ötken ayda amérika déngiz armiyesining tinch okyan qisimlirining bash qomandani filip déwidson xitayning jenubiy xitay déngizidiki baza kéngeytish herikitini amérikining mezkur rayondiki mewjutluqi üchün xiris peyda qilidu, dep körsetken. Shundaqla buni “Xitayning hazir peqet esker yötkimigen yérila qaldi,” dep tekitligen idi.

3-May küni aq saray bu mesile heqqide jiddiy inkas qayturup xitayning bu xildiki herbiyleshtürüsh qilmishini agahlandurghan. Aq sarayning bu heqtiki agahlandurushida xitay hökümitining bu qilmishining “Qisqa mezgillik we uzaq mezgillik aqiwetke sewebchi” bolidighanliqi alahide tekitlen'gen.

Melum bolushiche, xitayning bu yosunda berpa qilghan herbiy baziliri herqachan bashqa döletlerning herbiy qisimlirini nishan qilip kelmekte iken. Xitayning chet'eldiki herbiy bazilirining biri afriqidiki jibutigha jaylashqan bolup, “Jenubiy xitay etigenlik géziti” ning 3-maydiki xewiride éytilishiche, bu jaydin uchup ötken amérika ayropilanliri oxshash bolmighan “Lazér nurluq parakendichilik” ke duch kelgen. CNN Ning bügünki xewiride bolsa bu xil “Lazér nur parakendichiliki” de bir qisim amérika uchquchilirining yarilan'ghanliqi éytilghan.

“Wal-strét zhurnili” gézitining 3-maydiki xewiride éytilishiche, besh burjeklik binadiki alaqidar xadimlar bu heqte inkas qayturup, “Bu xildiki ayropilanlarni küchlük lazérliq nur arqiliq parakende qilish hadisisi shübhisizki tasadipiy otturigha chiqip qalghan emes. Bizningche bu amérika üchün xiris we parakendichilik,” dégen.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet