Xitayning 400 neper herbiy qomandani korlada uchrashqan

Muxbirimiz shöhret hoshur
2018-05-23
Élxet
Pikir
Share
Print

Melum bolushiche, xitay xelq azadliq armiyesi quruqluq qisimlirining qerellik ötküzülidighan herbiy meshiqi tünügün korlada bashlan'ghan.

4 Kün dawam qilidighan bu meshiqte ilgirikiliridin perqliq halda 400 herbiy qomandan bu meydanda uchrashqan. Quruqluq armiye qomandani xen wéygo bilen siyasiy komissari lyu wéymu bu uchrishishtin orun alghan.

Xewerde déyilishiche, alaqidar herbiy xadimlar, bu qétimqi meshiq we uchrishishning meqsitini qoshunning neq meydanda urush qilish qabiliyitini ashurushla bolup qalmastin yene zéhniyet almashturush؛ yuqiri bilen töwen arisida buyruq we idiye almashturush ikenlikini ilgiri sürgen. Emma néme üchün neq meydanda urush qilish qabiliyitini ashurush üchün korlaning tallan'ghanliqi, qandaq zéhniyet emeldin qalidighanliqi izahlanmighan.

"Jenubiy xitay pochtisi" gézitining bügünki bu heqtiki xewiride mezkur herbiy meshiq we muhakimining arqa körünüshi süpitide nöwettiki Uyghur weziyiti heqqide melumat bérilgen. Melumatta, Uyghur rayonida yighiwélish lagérlirining mewjutluqi, uningda xitayning Uyghurlarni öz medeniyitidin waz kéchish we xitay kompartiyesini söyüshke mejburlawatqanliqi, we lagérning ichidiki weziyettin xelq'aradiki kishilik hoquq teshkilatlirining endishe qiliwatqanliqi tilgha élin'ghan.

Dunya Uyghur qurultiyi aliy rehbiri rabiye qadir xanimmu yighiwélish lagérliri heqqide dunyagha élan qilghan muraji'etnamiside, özining "Bu lagérlarda we rayonda yüz bérip qélish éhtimalliqi bolghan paji'elik weqelerdin endishe qiliwatqanliqini, chünki xelq azadliq armiyesining 1989-yili tyen'enménda öz ewladlirini tankigha basturush arqiliq öz wehshiylikini ispatlap bolghanliqi" ni eskertken idi.

Toluq bet