Хитай армийәси корлада һәрбий маневир өткүзгән

Мухбиримиз әркин
2018-05-25
Елхәт
Пикир
Share
Принт

Хитай қуруқлуқ армийәсиниң уйғур аптоном районида турушлуқ қисимлири 23‏-май күни корлада һәрбий маневир өткүзгән.

Хитай «йәр шари вақти гезити» ниң тарқатқан рәсимлик хәвиридә, маневирда тик учар вә башқурулидиған бомбиларниң ишқа селинғанлиқи, һәрбий тик учарларниң уруш мәйданиға әскәр ташлиғанлиқиға даир учурларни бәргән. Лекин, маневирниң конкрет қайси орунда өткүзүлгәнлики, қанчилик әскәр қатнашқанлиқи вә маневирниң кимгә қарши елип берилғанлиқиға даир һечқандақ хәвәр бәрмигән.


Мәзкур маневир башлиништин бирқанчә күн аввал «җәнубий хитай әтигәнлик почта гезити» хәвәр тарқитип, хитай қуруқлуқ армийәсиниң 400 нәпәр һәрбий офитсериниң корлада учрашқанлиқини, уларниң уруш иқтидарини өстүрүш мәшиқи вә муһакимиси елип баридиғанлиқи, учришишқа йәнә хитай қуруқлуқ армийәсиниң қомандани лю вейго, сиясий комиссари лю вейниң қатнашқанлиқини билдүргән.

Мәзкур гезитниң бу һәқтики хәвиридә йәнә мәзкур һәрбий мәшиқ вә муһакиминиң арқа көрүнүши тәһлил қилинип, нөвәттики уйғур вәзийити һәққидә мәлумат берилгән.

Хәвәрдә, уйғур районида йиғивелиш лагерлириниң қурулғанлиқи, бу лагерларда хитайниң уйғурларни өз мәдәнийитидин ваз кечишкә, хитай компартийәсини сөйүшкә мәҗбурлаватқанлиқи, бу лагерларниң хәлқара кишилик һоқуқ тәшкилатлирида әндишә қозғаватқанлиқи тилға елинған иди.

Хитай дөләт мудапиә министирлиқи тор бекитиниң хәвиридә, маневирниң корладики мәлум бир һәрбий мәшиқ базисида елип берилғанлиқи, маневирда қуруқлуқ армийәсиниң алаһидә уруш қилиш, истихбарат разведкиси елип бериш, електронлуқ қарши қоюш, һавадин туюқсиз һуҗум қилиш, йирақтин топқа тутуш қатарлиқ җәһәтләрдики күчи синақ қилинғанлиқини билдүрүлгән.

Пикирләр (0)
Share
Толуқ бәт