Xitay armiyesi korlada herbiy manéwir ötküzgen

Muxbirimiz erkin
2018-05-25
Élxet
Pikir
Share
Print

Xitay quruqluq armiyesining Uyghur aptonom rayonida turushluq qisimliri 23‏-may küni korlada herbiy manéwir ötküzgen.

Xitay "Yer shari waqti géziti" ning tarqatqan resimlik xewiride, manéwirda tik uchar we bashqurulidighan bombilarning ishqa sélin'ghanliqi, herbiy tik ucharlarning urush meydanigha esker tashlighanliqigha da'ir uchurlarni bergen. Lékin, manéwirning konkrét qaysi orunda ötküzülgenliki, qanchilik esker qatnashqanliqi we manéwirning kimge qarshi élip bérilghanliqigha da'ir héchqandaq xewer bermigen.


Mezkur manéwir bashlinishtin birqanche kün awwal "Jenubiy xitay etigenlik pochta géziti" xewer tarqitip, xitay quruqluq armiyesining 400 neper herbiy ofitsérining korlada uchrashqanliqini, ularning urush iqtidarini östürüsh meshiqi we muhakimisi élip baridighanliqi, uchrishishqa yene xitay quruqluq armiyesining qomandani lyu wéygo, siyasiy komissari lyu wéyning qatnashqanliqini bildürgen.

Mezkur gézitning bu heqtiki xewiride yene mezkur herbiy meshiq we muhakimining arqa körünüshi tehlil qilinip, nöwettiki Uyghur weziyiti heqqide melumat bérilgen.

Xewerde, Uyghur rayonida yighiwélish lagérlirining qurulghanliqi, bu lagérlarda xitayning Uyghurlarni öz medeniyitidin waz kéchishke, xitay kompartiyesini söyüshke mejburlawatqanliqi, bu lagérlarning xelq'ara kishilik hoquq teshkilatlirida endishe qozghawatqanliqi tilgha élin'ghan idi.

Xitay dölet mudapi'e ministirliqi tor békitining xewiride, manéwirning korladiki melum bir herbiy meshiq bazisida élip bérilghanliqi, manéwirda quruqluq armiyesining alahide urush qilish, istixbarat razwédkisi élip bérish, éléktronluq qarshi qoyush, hawadin tuyuqsiz hujum qilish, yiraqtin topqa tutush qatarliq jehetlerdiki küchi sinaq qilin'ghanliqini bildürülgen.

Toluq bet