Тәйвән: «хитай һәрбий парахотлириниң изини қоғлидуқ, мәсилә көрүлмиди»

Мухбиримиз шөһрәт һошур
2018-03-21
Елхәт
Пикир
Share
Принт

Түнүгүн тәйвән боғузида хитай һәрбий парахотлириниң һәрикәтлиниватқанлиқини байқиған тәйвән дөләт мудапиә министирлиқи буниңға қарита һавадин вә судин көзитиш елип барған.

Ройтерс агентлиқиниң бүгүнки бу һәқтики хәвиридә баян қилинишичә, хитай һәрбий парахотиниң изини қоғлиған тәйвәнниң һәрбий парахот вә айропиланлири хитай тәрәпниң һәрикәтлинишидә бинормаллиқ йоқлуқини байқиған.

Бу һәқтә ахбаратқа мәлумат бәргән тәйвән дөләт мудапиә министирлиқи хитай һәрбий парахотлириниң сәйшәнбә күни кәчтә һәрикәтләнгәнлики вә чаршәнбә күни чүштә тәйвән деңиз тәвәликидин узақлашқанлиқи, тәйвән боғузида әндишинәрлик бир әһвалниң йоқлуқини баян қилған.

Америкиниң өткән һәптә тәйвән саяһәт қанунини мақуллиши билән тәйвән дөләт рәһбәрлириниң америкида рәсмий зиярәттә болушиниң йоли ечилған. Түнүгүн хитай хәлқ қурултийиниң йепилиш мурасимида сөз қилған ши җинпиң, әгәр тәйвән тәрәп мустәқиллиқ урунушида болса тарихиниң җазасиға учрайдиғанлиқини билдүргән иди.

Ройтерс агентлиқиниң хәвиридә дейилишичә, америкиниң муавин ташқи ишлар министири алекс воң бүгүн тәйвән президенти сәй йиңвен билән бирликтә тәйбейдики бир сода йиғинға қатнашқан.

У мухбирларға қилған сөзидә «тәйвән буниңдин кейин хәлқара сәһниләрдә чәттә қалдуралмайду,» дегән вә тәйвәнниң дуня билән ортақлишиши керәк болған көп ишларниң барлиқини тәкитлигән.

Пикирләр (0)
Share
Толуқ бәт