Хитайниң бу йиллиқ һәрбий хамчоти төвәнләп 7.6% Кә чүшкән

Мухбиримиз қутлан
2017-03-06
Елхәт
Пикир
Share
Принт

Хитайниң бу йиллиқ дөләт мудапиә хамчотиниң таки өткән йилиғичә давамлашқан икки рәқәмлик өсүш һалитидин бирдинла бир рәқәмлик һалитигә чүшкәнлики хәлқара җәмийәтниң диққитини қозғимақта.

Бирләшмә агентлиқниң бу һәқтики хәвиригә қариғанда, хитай малийә министирлиқи «блумберг хәвәрлири» гезитиниң мухбириға хитайниң 2017-йиллиқ һәрбий хамчотиниң 1 тирилйон 44 милярд сом, йәни 151 милярд америка доллири болидиғанлиқини билдүргән.

Һалбуки, хитай һөкүмити йәкшәнбә күни хитай мәмликәтлик хәлқ қурултийи йиғинида бәргән доклатида бу йиллиқ һәрбий хамчоти һәққидә юқириқи рәқәмни тилға алмиған.

Хитайниң йилларчә давамлашқан һәрбий хамчотидики икки рәқәмлик өсүш нисбитиниң бу йил туюқсиз бир рәқәмгә чүшүп қелиши диққәт қозғиған. Бәш бурҗәклик бинаниң бу һәқтики бир доклатида, өткән йили хитай һөкүмити әмәлийләштүргән һәрбий селинминиң әмәлийәттә улар сиртқа елан қилған рәқәмдин нәччә он милярд доллар артуқ икәнлики әскәртилгән.

Америка президенти доналд трамп өткән һәптә америкиниң бу йиллиқ һәрбий хамчотиниң 10 пирсәнт әтрапида болидиғанлиқини билдүргән иди. Америкидики алақидар мәнбәләрниң тәкитлишичә, трамп һөкүмитиниң һәрбий хамчотни ашуруши асаслиқи ислам дөлити күчлири билән хитайниң һәрбий кеңәймичиликини чәкләш үчүн икән.

Мәлум болушичә, америкиниң йиллиқ һәрбий хамчоти 600 милярд доллардин артуқ болуп, америка армийәси йәнила пүтүн йәр шаридики әң қудрәтлик вә һәрбий селинмиси әң көп армийә һалитини сақлимақтикән.

Пикирләр (0)
Share
Толуқ бәт