Amérika armiyesining admirali, xitay herbiy xam chotining éniq emeslikini bildürdi

Muxbirimiz erkin
2018-03-06
Élxet
Pikir
Share
Print

Xitay xelq qurultiyining memliketlik yighini düshenbe küni 2018‏-yilliq xitay herbiy xam chotining 8.1 Pirsent östürülgenlikini élan qilghan idi. Lékin seyshenbe küni amérika tinch okyan pilotining qomandani skot swifit uninggha inkas bildürüp, xitay herbiy xam chotining éniq emeslikini tekitligen.

Rotérs agéntliqining xewer qilishiche, skot swifit, xitayning herbiyge salghan "Sélinmisi we uning meqsiti ochuq ashkara bolushi kérek" likini eskertip, lékin uning "Meqsiti taza éniq emes" dégen. U bu sözlerni qilishtin bir kün awwal xitay xelq qurultiyi 2018‏-yilliq herbiy xam chotining 8.1 Pirsent östürülüp, 173 milyard dollargha chiqirilghanliqini élan qilghan. Bu uning yéqinqi 3 yildin béri herbiy xam chotini eng köp östürgen bir yil bolup qaldi. Xitay hökümiti herbiy xam chotining éniq we héchkimge xewp yetküzmeydighanliqini ilgiri sürsimu, biraq uning herikiti qoshna döletlerde bolupmu yaponiye bilen teywende ensizlik yaritip kelgen.

Admiral skot swifit yuqiriqi sözlerni yaponiye paytexti tokyoda ötküzülgen yumilaq üstel yighinida muxbirlargha qilghan.

Roytérs agéntliqining qeyt qilishiche, u xitay herbiy xam chotining éniq bolmasliqi iztirap peyda qilidighanliqini bildürüp mundaq dégen: "Rayondiki döletlerning kallisida nurghun so'allar bar. Buning némidin dérek béridighanliqi rayonning sirtidiki döletlerdimu diqqet qozghimaqta. Uning herbiy sélinmisining bundaq artishida kishiler perezge tayinip qalmasliqi kérek."

Lékin xitayning "Xelq géziti" seyshenbe küni bash maqale élan qilip, uning herbiy xam chotni östürgenlikini aqlidi. "Xelq géziti" ning bash maqaliside, uning herbiy xam chotining eqilge muwapiq ikenliki, uning herbiy xam choti amérika herbiy xam chotining 4 din birige toghra kélidighanliqini tekitligen. Lékin chet'ellik analizchilar we diplomatlarning perez qilishiche, xitayning emeliyettiki herbiy xam choti u élan qilghandin köp artuq iken.

Toluq bet