Хитай һөкүмити: «американиң ‹уйғур қануни' хитайниң террорлуққа қарши туруш тиришчанлиқини қарилиғанлиқ»

Мухбиримиз әркин
2020-05-29
Share

Хитай ташқи ишлар министирлиқи 29-май күни американиң «2020-йиллиқ уйғур кишилик һоқуқ сиясити қанун лайиһәси» гә инкас билдүрүп, уйғурларниң кишилик һоқуқини дәпсәндә қиливатқан хитай әмәлдарлирини җазалаш тоғрисидики мәзкур қанун лайиһәсини «хитайниң террорлуққа қарши туруш тиришчанлиқини қарлиғанлиқ,» дәп әйиблигән.

Мәзкур қанун лайиһәси 27-май күни америка авам палатасида 1 гә қарши 413 авазниң қоллиши билән мақуллинип, президент трампниң имзалишиға сунулған иди.

Бу хитай һөкүмитиниң мәзкур қанун лайиһәси мақулланғандин бери тунҗи қетим униңға инкас билдүрүшидур. Ройтерс агентлиқиниң хәвәр қилишичә, хитай ташқий ишлар министирлиқиниң баянатчиси җав лиҗйән 29-май күни «уйғур кишилик һоқуқ сиясити қанун лайиһәси» ни әйибләп, бу қанун «хитайниң террорлуққа қарши туруш тиришчанлиқиға очуқ-ашкара қара чаплиғанлиқ шундақла хитайниң ички ишлириға еғир дәриҗидә арилашқанлиқ,» дегән.

Ройтерс агентлиқиниң билдүрүшичә, җав лиҗйән йәнә американиң «шинҗаң мәсилисини козир қилип, хитайниң ички ишлириға арилишишини тохтитиши» ни тәләп қилған. «2020-Йиллиқ уйғур кишилик һоқуқ сиясити қанун лайиһәси» дә америка һөкүмитиниң 180 күн ичидә дөләт мәҗлисигә уйғур райониниң вәзийити һәққидә доклат сунуши, районда кишилик һоқуқни дәпсәндә қиливатқан уйғур аптоном районлуқ парткомниң секретари чен чүәңо башчилиқидики хитай әмәлдарлириға қарита җазалаш тәдбирлирини йүргүзүши тәләп қилинған.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт